Mınıstr: Et baǵasyn ósirgen eksport suranysy ǵana emes
ASTANA. KAZINFORM — Aýyl sharýashylyǵy mınıstri Aıdarbek Saparov Kazinform-ǵa bergen suhbatynda ettiń qymbattaýyn ádiletti qubylys retinde baǵalady.
— Ettiń qymbattaýyna keshendi sebep áser etti. Janarmaı men tarıftiń, em-dáriniń qymbattaýynan, aılyqty kóterý qajettiliginen ózindik quny ósti. Onyń ústine 40 kún synbaǵan shólmektiń bir kún synatyn faktory da áser etti. Et baǵasy talaıdan beri bir deńgeıde turdy. Osylaısha serippedeı syǵymdala tústi. Al byltyr sol serippe bosap, baǵa naryq deńgeıine shyqty, — deıdi A.Saparov.
Mınıstr etke syrttan qalyptasqan suranys baǵaǵa sonshalyq áser etpedi dep esepteıdi.
— Eksport suranysynyń faktory da bar, biraq ol onsyz da ósip jatqan baǵany qamshylaı tústi. Eksportqa ketip jatqan et óndirilgen ettiń az bóligi ǵana. Mysaly, 2025 jyly 435 myń tonna sıyr eti óndirilse, sonyń 32 myń tonnasy ǵana syrtqa satylǵan (7%), — dedi mınıstr.
Vedomstvo basshysy ettiń baǵasy ádiletti bolǵany aýyldaǵy aǵaıynǵa jaqsy ekenin de eske saldy.
— Adamdar fermer de ózi sııaqty azamat ekenin umytyp ketedi. Ol da laıyqty ómir súrsem, balam sapaly bilim alsa dep oılaıdy. Jumysshylarynyń laıyqty aılyq alǵanyn qalaıdy. Sharýa da eńbegine saı tabys tabý kerek. Malshynyń mańdaı teri azyq-túlik qaýipsizdigin qamtamasyz etip otyr, — dedi Aıdarbek Saparov.
Buǵan deıin álemdegi sıyr etiniń baǵasy men Qazaqstandaǵy baǵany salystyrǵan edik.
