Mınıstr Erjan Maksımge: Álemniń qazaq mádenıetin tanýǵa degen qushtarlyǵyn oıattyńyz

NUR-SULTAN. QazAqparat – QR Mádenıet jáne sport mınıstri Aqtoty Raıymqulova balalar «Junior Eurovision -2019» án baıqaýynda 2-oryn alǵan jas ánshi Erjan Maksımdi quttyqtady, dep habarlaıdy QazAqparat tilshisi.

«Qurmetti Erjan! Sizdi Junior Eurovision song contest-2019 baıqaýynda júldeli ekinshi oryn alýyńyzben shyn júrekten quttyqtaımyn! Siz Polshanyń Glıvıtse qalasynda ótken Junior Eurovision halyqaralyq án baıqaýyndaǵy jarqyn ónerińizben kezekti ret asqaq armanǵa degen qulshynysy zor daryndy, eńbekqor ánshi ekenińizdi pash ettińiz. Rasynda, sizdiń oryndaýyńyzdaǵy ásem án álem halyqtarynyń qazaq mádenıetimen tanysa túsýge degen qushtarlyǵyn oıatqany sózsiz. Aldaǵy ýaqytta da jahandyq baıqaýlarda sátti óner kórsetip, jarqyn jetistikterińizben el mereıin ústem ete berińiz. Osynaý sátti paıdalana otyryp, Sizge zor densaýlyq, tolaıym shyǵarmashylyq tabys tileımin!», - dep jazylǵan mınıstrdiń quttyqtaýynda.

Eske sala ketsek, Polshada ótken «Junior Eurovision-2019» án baıqaýynda baq synaǵan qazaqstandyq Erjan Maksım ekinshi oryn alǵan bolatyn.

Qazylardyń bergen baǵasy boıynsha Erjan Maksım birinshi oryn aldy. Al onlaın daýys berý qorytyndysymen 79 upaı jınady. Osylaısha qazaqstandyq ánshi jalpy 227 upaımen ekinshi oryn boldy. Baıqaýdyń bas júldesin 278 upaı jınaǵan Polsha ókili Vıkı Gabor jeńip aldy.

Osyǵan deıin jas ánshini QR Prezıdenti Qasym-Jomart Toqaev quttyqtaǵanyn jazǵan edik.