Mınıstr Erbol Myrzabosynovtyń atynan jalǵan málimdeme birneshe tilde tarady
ASTANA. KAZINFORM — Týrızm jáne sport mınıstri Erbol Myrzabosynovtyń atynan jalǵan málimdeme tarady. Jarııalanǵan jalǵan aqparat 12 myń qaralym jınady.
Jalǵan aqparatqa qarsy is-qımyl ortalyǵynyń málimetinshe, sheteldik áleýmettik jeliler segmentinde Týrızm jáne sport mınıstri Erbol Myrzabosynovtyń atynan aıtylǵan, alaıda oǵan tıesili emes málimdemeler taralyp jatyr.
— Taldaý nátıjesinde bul aqparattyq materıaldyń X jáne Bluesky platformalaryndaǵy akkaýnttar arqyly orys, cheh jáne aǵylshyn tilderinde taratylǵany anyqtaldy. Aqparatty taratýshylar qatarynda Shyǵys jáne Ortalyq Eýropanyń birneshe elinde ornalasqan paıdalanýshylar bar. X platformasyndaǵy bastapqy jarııalanym birneshe saǵat ishinde 12 myńnan astam qaralym jınap, 200-den asa repost jasaldy. Birdeı mazmundaǵy málimdemeniń bir mezgilde birneshe tilde taralýy jalǵan aqparattyń júıeli túrde uıymdastyrylǵanyn ańǵartady, — deıdi vedomstvo mamandary.
Bul rette, Qazaqstan hokkeı federatsııasynyń atqarýshy dırektory taralǵan aqparatty resmı túrde teriske shyǵardy.
— Birqatar sheteldik buqaralyq aqparat quraldary men áleýmettik jelilerde Qazaqstan hokkeı federatsııasy reseılik hokkeıshilerge boıkot jarııalaýdy qoldady degen mazmundaǵy aqparat taralýda. Atalǵan aqparat shyndyqqa janaspaıdy. Qazaqstan Halyqaralyq hokkeı federatsııasynyń (IIHF) tolyqqandy múshesi jáne óz qyzmetin uıym jarǵysy men reglamentterine qatań sáıkes júzege asyrady. Bizdiń ustanymymyz boıynsha, ulttyq quramalardyń halyqaralyq jarystarǵa qatysýyna ruqsat berý jáne álem chempıonattaryna qatysýshylar quramyn aıqyndaý máseleleri Halyqaralyq hokkeı federatsııasynyń aıryqsha quzyretine jatady. Mundaı sheshimder tıisti sot organdarynyń ustanymy men qoldanystaǵy halyqaralyq sport normalary eskerile otyryp qabyldanýǵa tıis. Qazaqstan hokkeı federatsııasy halyqaralyq yntymaqtastyqty damytý, sporttaǵy adal básekelestikti qamtamasyz etý jáne barlyq qatysýshy úshin teń jaǵdaı qalyptastyrý qaǵıdattaryn turaqty túrde qoldaıdy, — delingen federatsııa taratqan aqparatta.
Osylaısha, áleýmettik jelilerde taralyp jatqan málimdemeler shyndyqqa sáıkes kelmeıdi. Qazaqstannyń resmı ustanymyn burmalaý arqyly halyqaralyq shıelenisti qoldan kúsheıtý kózdelýi múmkin.
Jalǵan aqparatqa qarsy is-qımyl ortalyǵy áleýmettik jelilerdegi jarııalanymdarǵa synı kózqaraspen qarap, ondaǵy málimetterdi resmı derekkózder arqyly mindetti túrde tekserý qajettigin taǵy da eske salady.
Buǵan deıin álemdi dúrliktirgen 12 feık týraly jazǵanbyz.
