Mınıstr elorda mektebinde oqýshyǵa jasyryn ekpe salý oqıǵasyna qatysty pikir bildirdi
«Balalar qaýipsizdigi týraly sóz etkende elordanyń №58 mektebinde bolǵan jaıtty aıtpaı ketýge bolmaıdy. Bul - mekteptiń ishki erejesiniń buzylýy, bógde kisiniń sabaqtyń ótýine kedergi jasap, qaýip tóndirýi. Atalǵan mektep basshylyǵy tıisti shara qoldanyp, jedel áreket etpedi. Jalpy aıtqanda balalardyń qaýipsizdigine qaýip tóndirdi. Balalardyń ómiri men qaýipsizdigi únemi mańyzdy», - dedi Ashat Aımaǵambetov mınıstrliktiń apparat keńesi jıynynda.
Onyń aıtýynsha, kez kelgen bilim berý oshaǵy balalardyń qaýipsizdigin tolyq qamtamasyz etýi tıis.
Qaýipsizdik algorımti, sheshimder, tehnıka, beınebaqylaý kamerasy bári de balalardyń qaýipsizdigi jolynda jumys isteýi kerek. Bul jaǵdaıdy mekteptegi qaýipsizdikke júrgizilgen tekserý boldy desek bolady. Al eger múldem basqa adamdar bolsa ne bolar edi ? Ol azdaı oqıǵa ótkennen keıin araǵa birneshe kún salyp aıtyla bastady. Mektep basshylyǵy bolǵan jaǵdaıǵa jedel áreket etpeýimen qatar, ony jasyryp baqty. Esh áreket etpedi», - deıdi ol.
Eske sala ketsek, 26 qazanda áleýmettik jeliler men messendjerlerde qazaqstandyqtar Nur-Sultanda №58 mektepte ata-analardyń resmı túrde bas tartýyna qaramastan balalarǵa jasyryn ekpe jasalatyny týraly aqparat taraǵan edi.
Habarlamada oqýshylardyń birine dárethanaǵa vaktsına salynǵany aıtylǵan. Degenmen oqıǵanyń shyndyqqa sáıkes kelmeıtindigi anyqtaldy. Ol týraly Stopfake.kz resmı habar taratty.
