Mınıstr elimizde jańadan qaı avtokólik túrleri shyǵarylatynyn jarııalady
ASTANA. KAZINFORM – Elimizdegi eki qalada avtokomponenttik bazany damytý boıynsha jobalar pysyqtalyp jatyr. Bul týraly QR Ónerkásip jáne qurylys mınıstri Qanat Sharlapaev málim etti.
«Avtomobıl jasaýda avtokólik qurastyrýdyń neǵurlym kúrdeli deńgeıine kezeń-kezeńmen kóshý jóninde sharalar qabyldanyp jatyr. Avtokólik óndirýshileriniń aldynda shaǵyn torapty qurastyrý úlesin 2027 jylǵa qaraı jalpy óndiris kóleminen 50 paıyzǵa deıin ulǵaıtý boıynsha mindettemeler tur. Bıyldyń ózinde biz shamamen 20 paıyzǵa, kelesi jyly – 30 paıyzǵa, al 2026 jyly 40 paıyzǵa jetkizýge tıispiz», - dedi Q. Sharlapaev Parlament Májilisindegi Úkimet saǵatynda.
Onyń aıtýynsha, Qostanaı jáne Almaty qalalaryndaǵy shaǵyn ónerkásiptik aımaqtardyń alańdarynda avtokomponenttik bazany damytý boıynsha jobalar pysyqtalyp jatyr. Oryndyqtar óndirisi men Qytaı avtomobılderin shyǵaratyn kóp brendti zaýyt salý jobasy júzege asyrylyp otyr. Budan basqa, kólikterge arnalǵan plastıkalyq bólshekter men mýltımedııalyq júıeler óndiretin kásiporyndardy paıdalanýǵa berý josparlanǵan.
«2026 jylǵy 1 qańtardan bastap dánekerleý jáne boıaý jónindegi operatsııalar Qazaqstan aýmaǵynda óndiriletin árbir avtomobıl brendinde qamtylady. 2027 jylǵa qaraı shaǵyn torapty qurastyrý ádisimen shamamen 200 myń avtomobıl shyǵarý josparlanǵan. Sonymen qatar, óndirilgen avtomobılder jelisi «SaryarqaAvtoProm» JShS Jetour (2024 jyly) markasymen tolyqtyrylyp, chehııalyq «Skoda» kompanııasymen kelissózder jalǵasyp jatyr. Budan bólek, «Astana Motors» kompanııalar toby
2025 jylǵa deıin iske qosylýy josparlanǵan óndiristik jelini uıymdastyrý úshin «Changan», «Chery», «Haval» sekildi qytaılyq tanymal brendterdi tartty», - dedi mınıstr.
