Elimizde eń tómengi jalaqy mólsheri qashan ósýi múmkin
ASTANA. KAZINFORM – Elimizde eń tómengi jalaqy óse me? Bul suraqqa QR Eńbek jáne halyqty áleýmettik qorǵaý mınıstri Svetlana Jaqypova jaýap berdi.
- Byltyr eń tómengi jalaqy aıqyndaýdyń jańa ádistemesin qabyldadyq. Onda eńbek ónimi men medıandyq jalaqynyń sáıkestigi eskerilgen... Qazirgi kezde birneshe ınstıtýt óńirler men salalar boıynsha eńbek ónimdiligi men medıandyq eńbekaqy jáne ınflıatsııa deńgeıine qatysty naqty kórsetkishterdi shyǵarý úshin zertteý júrgizip jatyr. Osynyń bári elimizde eń tómengi jalaqyny esepteý kezinde eskeriledi, - dedi S. Jaqypova Parlament palatalarynyń birlesken otyrysy aldynda.
Osy oraıda tilshiler eń tómengi jalaqy qanshalyqty kóteriletinin surady.
Óz kezeginde mınıstr naqty deńgeı atalǵan zertteýden keıin jarııalanatynyn, ıaǵnı jyl sońyna deıin aıqyndalatynyn aıtty.
- Keler jyldyń 1 qańtarynan eń tómengi jalaqy deńgeıin kóterý úshin bul jumystar jyl sońyna deıin aıaqtalady, - dedi vedomstvo basshysy.
Aıta keteıik, elimizde eń tómengi jalaqy 85 000 teńge. Buǵan deıin byltyr kúzde Svetlana Jaqypova elimizdegi eń tómengi jalaqynyń ósýine qatysty túsinik bergen edi.
Sonymen qatar jaqynda Premer-mınıstrdiń orynbasary – Ulttyq ekonomıka mınıstri Serik Jumanǵarın Májilistiń jalpy otyrysynan keıin eń tómengi aılyqty kóterý týraly depýtat usynysyna jaýap berdi.