Mınıstr elimizdegi sý bógetteri qalaı tekseriletinin aıtty
«Qazirgi ýaqytta elimizdiń aýmaǵynda 1715 gıdrotehnıkalyq qurylystar bar. Olardyń kóbiniń, ıaǵnı shamamen 97 paıyzynyń paıdalaný merzimi 25 jyldan asyp ketken. Apatty jaǵdaıdy boldyrmas úshin olardyń jáı-kúıi baǵalaýdy talap etedi. Ol úshin qaralyp otyrǵan zań jobasynda kópfaktorly zertteý uǵymy engiziledi. Bul zertteý qalaı júrgiziledi?», - dep surady depýtat Qanat Mýsın.
Aýyl sharýashylyǵy mınıstri Sparhan Omarov búginde atalǵan nysandardyń kóbisiniń jaǵdaıy nashar ekenin, sonyń 26-sy apatty kúıde ekenin aıtty.
«Bulardy teksergende úsh sanatqa bólý kerek. Osy oraıda qalypty, áleýetti qıyn jáne apatty jaǵdaılar boıynsha jikteledi. Sony tekserý úshin zań jobasyna kópfaktorly tekserý degen uǵymdi engizip otyrmyz. Bul gıdrotehnıkalyq qurylystardy tekserý olardyń (nysandy paıdalanýshylar) ózderiniń bergen aqparatymen júrgizilgen nemese quzyretti organdardyń vızýaldy tekserýi jolymen atqarylǵan. Árıne, bul qadamdar búgingi talaptarǵa saı kelmeıdi, sondyqtan kópfaktorly zertteý engizilýde. Kópfaktorly júıe gıdroqurylymǵa baılanysty barlyq jaǵdaıdy tekserýdi qamtıdy, ıaǵnı onyń mehanızmderin, bógetterdiń beriktigin, toǵandardyń shaıylyp ketý qaýpin tekserý eskerilgen. Zań jobasy qabyldanǵannan keıin, tıisti qujattarda barlyq sharalar qamtylady», - dedi mınıstr.
Budan buryn habarlanǵandaı, búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine agroónerkásiptik keshendi retteý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.