Mınıstr elimizdegi kólder nege bıznes ókilderiniń basqarylýyna beriletinin túsindirdi

NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev Qazaqstanda kólder nelikten jekeniń qolyna beriletinin túsindirdi, dep habarlaıdy QazAqparat tilshisi.

«Bul ne úshin jasalady? Sebebi jeke tulǵa kelgen týrısterdiń jaqsy ári jaıly demalýy úshin barlyq jaǵdaıdy jasaýy kerek. Sonymen birge, sanıtarlyq gıgıena boıynsha bazalyq talaptar oryndalýy tıis», - dedi Maǵzum Myrzaǵalıev OKQ-da tilshilerdiń suraǵyna jaýap bere otyryp.

Mınıstr árbir jaǵdaıda jalǵa alýshylar belgili bir mindettemeni alatynyn jetkizdi.

«Týrızmdi damytý, sonymen birge tabıǵatqa zııan keltirmeý úshin jaǵdaı jasalýy kerek. Atap aıtqanda Kóbeıtuz, Qorjynkól, basqa da kólderdi baqylaý – jergilikti atqarýshy organdardyń quzyreti. Álbette ákimdikter tıisti jaǵdaıdy jasaý boıynsha durys ıdeıany ustanǵysy keledi. Alaıda jeke bıznes memleketke qaraǵanda kóbirek jaıly jaǵdaı jasaıdy. Ony túsiný kerek. Alaıda bıznestiń túpki mindeti – tabıǵatqa zııan keltirmeý bolýy tıis», - dedi Maǵzum Myrzaǵalıev.