Mınıstr elektr stantsııalary jabdyqtaryn jóndeý merzimi saqtalmaǵan óńirlerdi atady

NUR-SULTAN. QazAqparat – Elimizdiń 4 oblysynda elektr stantsııalarynyń negizgi jabdyqtaryn jóndeý merzimderi saqtalmaǵan. Bul týraly Úkimet otyrysynda QR Energetıka mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Energetıkalyq kásiporyndardyń kúzgi-qysqy kezeńdegi jumysqa daıyndyǵy jalǵasýda. Júıelik operator bekitken grafıkke sáıkes elektr stantsııalardaǵy 4 energoblok, 18 qazan, 19 týrbına jóndeldi. Al 2 energoblok, 25 qazan men 16 týrbınany boıynsha jóndeý jumystary áli de jalǵasýda. Búgingi kúnge jospar boıynsha 20 464 shaqyrym elektr berý jelileriniń 13 773 shaqyrym jóndelse, al 462 qosalqy stantsııanyń 316 qalpyna keltirildi. Bul jeliler boıynsha jyldyq jospardyń 67, al qosalqy stantsııalar boıynsha 68 paıyzdy quraıdy», - dedi mınıstr.

Alaıda, onyń dereginshe, Atyraý, Qaraǵandy, Pavlodar, Soltústik Qazaqstan oblystarynda elektr stantsııalarynyń negizgi jabdyqtaryn jóndeý merzimderi saqtalmaǵan.

«Atomdyq jáne energetıkalyq qadaǵalaý men baqylaý komıteti oblys ákimdikterimen birlesip, energetıkalyq kásiporyndardyń aldaǵy jylytý maýsymyna daıyndyǵyna turaqty baqylaý júrgizip, elektr stantsııalaryndaǵy jóndeý jumystaryn ýaqtyly aıaqtaý boıynsha is-sharalar qabyldap jatyr», - dedi ol.