Mınıstr eldegi ajyrasý jaǵdaıynyń ósýine alańdaýshylyq bildirdi

NUR-SULTAN. QazAqparat – Aqparat jáne qoǵamdyq damý mınıstri Aıda Balaeva halyqqa esep berý kezinde jastardyń ajyrasý jaǵdaıy artyp bara jatqanyn málimdedi, dep habarlaıdy QazAqparat tilshisi.

«Memleket basshysynyń Joldaýynyń basty basymdyqtarynyń biri – otbasy jáne balalardy qoldaý sharalary. Qazirgi tańda ókinishke qaraı, qoǵam ózgerisimen birge otbasynyń qundylyqtary da ózgerip bara jatqanyn aıta ketý kerek. Eldegi ózekti máselelerdiń biri – ajyrasý jaǵdaıynyń artýy. 2017 jyly ajyrasýdyń 55 myń jaǵdaıy (tirkelgen nekelerdiń 39 paıyzy) tirkelse, 2019 jyly bul kórsetkish 60 myńǵa (43 paıyzy) jetken. Sonymen birge mundaı belsendi statıstıkaǵa AÁK aınalasyndaǵy jaǵdaı sebep bolǵanyn jetkizgim keledi», dedi mınıstr. Onyń aıtýyna qaraǵanda, materıaldyq kómek alý úshin «ótirik ajyrasý» da beleń alǵan.

Mınıstrdiń aıtýynsha qazirgi tańda qoǵamda bolyp jatqan kez kelgen ózgeris otbasyna jaǵymsyz sıpatta áset etýi múmkin. Sol sebepti memlekettiń áleýmettik mindetteriniń mańyzdy bir bóligi – otbasy, ana men balany qorǵaý bolyp otyr.

«Negizgi amal-ádister 2030 jylǵa deıingi otbasy men genderdik saıasat tujyrymdamasynda kórsetilgen. Bıyl osy Tujyrymdamanyń ekinshi kezeńin júzege asyrý jumystary bastaldy. Ol otbasy ınstıtýtyn jetildirip, reprodýktıvti densaýlyqty nyǵaıtyp, turmystyq zorlyq-zombylyqtyń aldyn alýǵa baǵyttalǵan», - dedi Aıda Balaeva.