Mınıstr eldegi gaz ben benzın qory týraly túsindirme jasady

ASTANA. KAZINFORM – QR Energetıka mınıstri Almasadam Sátqalıev elimizde otyn tapshylyǵy joq ekenin aıtty. 

A. Sátqalıev buǵan deıin zaýyttar munaı ónimderine ishki naryq qajettiligin jabý úshin jóndeýge shyǵarylmaıtynyn nemese merziminen buryn jóndeýden shyǵarý tájirıbesi bolǵanyn atap ótti. Bul ınfraqurylymnyń aıtarlyqtaı eskirýine ákeldi.

«Bizdiń basty maqsatymyz – qys mezgilinde jáne tutastaı alǵanda munaı óńdeý zaýyttarynyń jyl boıy turaqty jumys isteýi. Sondyqtan biz jumys rejımin ózgerttik jáne barlyq zaýyttar belgilengen josparly merzimderge sáıkes jóndelýi kerektigine nazar aýdaramyz. Bul rette zaýytty jóndeýge shyǵarý úshin biz otyn qoryn aldyn ala jınaı bastaımyz», - dedi A.Sátqalıev. 

Onyń aıtýynsha, Energetıka mınıstrligi munaı ónimderin tutyný statıstıkasyn júrgizedi jáne tıisti qordy daıyndaıdy. Qajet bolǵan jaǵdaıda janarmaı ımporty týraly kelisimder de bar. 

«Qazirgi ýaqytta eshqandaı másele joq. Bizde 27 kúnnen asatyn ýaqytqa dızel, benzın, 45 kúnge – avıakerosın bar jáne esh problema bolmaıtynyna senimdimiz. Keıbir aımaqtarda keıbir janarmaı quıý beketterinde suıytylǵan gaz tapshylyǵyna qatysty máseleler boldy. Egin jınaý naýqany men jańbyrǵa baılanysty óńirlerdegi aýyl sharýashylyǵy óndirýshileri astyq pen burshaq daqyldaryn keptirý úshin dızel otyny men suıytylǵan munaı gazynyń qosymsha kólemin surady. Osyǵan baılanysty qosymsha izdeýge týra keldi, biraq jóneltý belgilengen kestelerge sáıkes júrip jatyr. Óńir ishinde ishki bólýmen baılanysty máseleler bar, biraq elimizde munaı ónimderiniń birde-bir túrine tapshylyq joq», - dedi A. Sátqalıev.