Mınıstr eldegi eń uzyn kópirdi kútip ustaýǵa qansha qarjy ketetinin aıtty
ASTANA. KAZINFORM – Kólik mınıstri Marat Qarabaev Májilis otyrysynan keıin ótken baspasóz máslıhatynda Shyǵys Qazaqstan oblysynyń birneshe aýdanyn oblys ortalyǵymen tikeleı baılanystyrý úshin salynǵan eldegi eń uzyn kópirdi kútip ustaýǵa qansha qarajat kerek bolatynyn aıtty.
«Jalpy ol kópir strategııalyq nysan bolyp tur. Kópirdegi qozǵalysqa monıtorıng júrgizý úshin 102 kamera ornatylǵan. Kópirge qyzmet kórsetý úshin jeke brıgada jumyldyrylatynyn sózsiz. Qaýipsizdik maqsatynda kópirdiń eki basyna blok postar qoıyldy. Ol postarda polıtsııa departamentiniń bólimsheleri jumys isteıdi», -dedi ol.
Al kópirdi kútip ustaý oblys ákimdigine júktelmek.
«Al kútip ustaýyna kelsek, qatelespesem, 300 mln teńgedeı kerek. Ony naqtylaý kerek. Bul jumys oblys ákimdiginiń qurylymyndaǵy jergilikti baǵynystaǵy joldardyń bárine qyzmet kórsetetin uıymǵa júkteledi», - dedi ol.
Eske salsaq, buǵan deıin jergilikti ákimdik jańa kópir turǵyndar úshin tegin bolatynyn málim etken edi.
