Mınıstr «El arnanyń» jabylýyna oraı túsinikteme berdi
ASTANA. QazAqparat - «El arnanyń» ornyna respýblıkalyq bıýdjet qarjysy «24.kz» telearnasyn qarjylandyrýǵa jáne jańa fılmder túsirýge jumsalatyn bolady. Búgin Májilistegi «2014-2016 jyldarǵa arnalǵan respýblıkalyq bıýdjet týraly» zańǵa ózgerister men tolyqtyrýlar engizý týraly» zań jobasynyń tanystyrylymy barysynda Ekonomıka jáne bıýdjettik josparlaý mınıstri Erbolat Dosaev osylaı málim etti.
Toqtala ketetin jaıt, bıýdjet jobasyn talqylaý barysynda depýtattar tarapynan «El arna» telearnasynyń jumysyn toqtatý sebepterin túsindirý suralǵan bolatyn. «Biz jyl saıyn «El arna» telearnasyna 2 mlrd. teńge bólip kelgen bolatynbyz. Alaıda, reıtıng boıynsha osy arna 300 mln. teńgeni ǵana jınaı alady, bul birinshiden. Ekinshiden, Memleket basshysynyń Úkimetke byltyrǵy jyldyń qazan aıyndaǵy keńeıtilgen otyrysynda bergen tapsyrmalary bar. Onda Prezıdent kontent boıynsha suranysqa ıe telearnalarǵa ǵana qoldaýdy jalǵastyrýdy júktegen bolatyn. Al «El arna» kontenti, ózderińiz biletindeı jartylaı satyp alynǵan, aýdarylǵan, al óziniń qurap otyrǵan kontenti jetkiliksiz», - dedi mınıstr Erbolat Dosaev.
Onyń aıtýynsha, «El arnaǵa» bólinip kelgen 2 mlrd. teńgeniń teń jartysy, ıaǵnı 1 mlrd. teńgesi «24.kz» telearnasynyń aımaqtyq tilshiler qosynyn keńeıtýge bólinedi. Budan bólek, 992 mln. teńge somasyndaǵy bıýdjet qarajaty jańa fılmder túsirýge jumsalatyny qarastyrylyp otyr.
