Mınıstr densaýlyq saqtaý salasynda jemqorlyqpen kúrestiń qadamdaryn aıtty

NUR-SULTAN. QazAqparat - Búgin halyq aldynda esep berý kezdesýinde QR Densaýlyq saqtaý mınıstri Alekseı Tsoı sybaılas jemqorlyqqa tosqaýyl qadamdaryn aıtty, dep habarlaıdy QazAqparat tilshisi.

«Sońǵy ýaqytta densaýlyq saqtaý uıymdaryndaǵy sybaılas jemqorlyq týraly kóp aıtylady. Osyǵan baılanysty, biz Densaýlyq saqtaý mınıstrliginiń, Áleýmettik medıtsınalyq saqtandyrý qorynyń jáne SQ-Farmatsııanyń qyzmetindegi sybaılas jemqorlyq táýekelderine syrtqy taldaýdy uıymdastyrdyq. QR Sybaılas jemqorlyqqa qarsy is-qımyl agenttigimen birlesip Densaýlyq saqtaý salasynda sybaılas jemqorlyq táýekelderin boldyrmaý jónindegi Jol kartasy ázirlendi», - dedi mınıstr Ortalyq kommýnıkatsııalar qyzmetinde.

Osy oraıda ol sybaılas jemqorlyqpen kúresý úshin densaýlyq saqtaý júıesinde «Adaldyq alańy» jobalyq ofısi qurylǵanyn eske saldy.

Jobalyq ofısiniń mindetterine turmystyq sybaılas jemqorlyqty joıý jáne medıtsınalyq uıymdarda qolaıly jaǵdaı jasaý, halyqty jáne medıtsınalyq uıymdardy dári-dármekpen qamtamasyz etý boıynsha sybaılas jemqorlyq táýekelderiniń monıtorıngi, ashyqtyq, transparenttilik jáne eseptilik qaǵıdattarynda azamattyq qoǵammen yntymaqtastyqty qamtamasyz etý jatady.

«Budan basqa qazirgi ýaqytta jobalyq ofıs óńirlik densaýlyq saqtaý basqarmalarymen belsendi jumys júrgizýde. Mınıstrlikke barlyq baılanys arnalary arqyly kelip túsken jeke tulǵalardyń 857 myń ótinishi qaraldy», - dedi A. Tsoı.