Mınıstr dárigerlerdiń Aqtaý mańyndaǵy ushaq apatynan zardap shekkenderge qalaı kómekteskenin aıtty

ASTANA. KAZINFORM — Densaýlyq saqtaý mınıstri Aqmaral Álnazarova dárigerlerdiń Aqtaý mańyndaǵy ushaq apatynan zardap shekkenderge qalaı kómekteskenin aıtty.

Onyń paıymynsha, Aqtaý mańyndaǵy ushaqtyń apatqa ushyraý tragedııasy bizdiń shuǵyl qyzmetterimizdiń qanshalyqty jedel, naqty jumyldyrylatynyn kórsetti.

- Apat bolǵan jerge birneshe mınýttyń ishinde kelgen jedel járdem brıgadalarynyń úılesimdi jáne ýaqtyly is-qımylynyń arqasynda ushaq apatynan zardap shekken 29 adamnyń ómirin saqtap qaldy.

Budan ári Aqtaý qalasynyń oblystyq aýrýhanasynda zardap shekkenderdi alǵan jaraqattarynyń aýyrlyǵy men sıpaty boıynsha bilikti irikteý júrgizildi.

Aýyr jaraqattary bar adamdardy emdeýge jatqyzýdyń alǵashqy syn saǵattarynda dereý qurylǵylarǵa qosý, dál dıagnoz qoıý jáne qajetti dári-dármekterdi taǵaıyndaý mańyzdy boldy. Bizdiń dárigerler ómirdiń árbir mınýty qymbat bolǵan kúrdeli de qıyn jaǵdaıda joǵary kásibı deńgeıde bul tapsyrmany oryndady, - dep jazdy mınıstr.

Sondaı-aq, qarapaıym adamdar, ártúrli óńirlerden kelgen otandastarymyz da beıjaı qalmady, qıyndyqqa birden jaýap berdi.

- Eki kúnniń ishinde respýblıka boıynsha qan ortalyqtarynda 1,5 myńnan astam adam 800 lıtr qan tapsyrdy. Aqtaýdyń ózinde donorlyq pýnktterge 490 adam keldi, Astanada – 600 – den astam adam, Shymkentte – 125, Aqtóbede – 109, Jetisýda – 49, Qaraǵandyda-40, ShQO-34 adam qan tapsyrdy jáne basqa óńirlerde de adamdar bul apatqa beı-jaı qaraǵan joq.

Osyndaı qıyn sátterde biz adam ómiriniń názik ekenin jáne aýyzbirshilik pen uıymshyldyqtyń kúshi qanshalyqty zor ekenin odan da qatty sezinemiz, - delingen jazbada.

Mınıstr medıtsına qyzmetkerlerine kómektesken, qaıǵyly ushaq apatynan zardap shekkenderge qan tapsyrýǵa qatysqan árbir adamǵa shyn júrekten alǵys aıtty.

Aıta keteıik, Densaýlyq saqtaý mınıstrligi buǵan deıin zardap shekken 6 adamnyń jaǵdaıy turaqtanǵanyn málimdedi.