Mınıstr: Bul — bir dárigerge emes, búkil densaýlyq saqtaý júıesine soqqy
ASTANA. KAZINFORM — Densaýlyq saqtaý mınıstri Aqmaral Álnazarova Qostanaı jáne Qaraǵandy qalalarynda dárigerlerge qatysty sumdyq oqıǵalardan keıin qazaqstandyqtarǵa úndeý joldady.
Mınıstr medıtsına qyzmetkerlerine qarsy zorlyq-zombylyqty toqtatýdy talap etti. Onyń sózinshe, Qostanaı oblystyq aýrýhanasynda qatygezdikpen soqqyǵa jyǵylǵan jas hırýrgtiń jaǵdaıy aýyr.
— Sizderge perzenthanada meıirger, balalar aýrýhanasynyń qabyldaý bóliminde kezekshi jáne ordınator dáriger bolyp jumys istegen maman retinde ún qatqym keledi: medıtsına qyzmetkerlerine qarsy zorlyq-zombylyqty toqtatyńyzdar! Negizsiz, ashý men yzaǵa boı aldyrǵan qatygez áreketter kezinde óz balalaryńyzdy, ata-analaryńyzdy, jaqyndaryńyzdy aman alyp qalýǵa jan salyp júrgen dáriger men meıirgerdiń boıyn bılegen jan jarasy men qorlyǵy, qorǵansyzdyǵy men úreıin elestetý múmkin emes. Biz taǵy da Qaraǵandy men Qostanaıda bolǵan eki soraqy jaǵdaıǵa kýá bolyp otyrmyz. Qaraǵandyda jeke klınıkanyń meıirgerine shabýyl jasaldy. Qostanaı oblystyq aýrýhanasynda ýrologııa bóliminiń jas hırýrgi qatygezdikpen soqqyǵa jyǵyldy. Patsıent óz kezegin kútkisi kelmegendikten, dárigerdi bir uryp, esinen tandyrǵan. Qazir dáriger reanımatsııada. Jaǵdaıy — aýyr, — dedi Álnazarova.
Densaýlyq saqtaý mınıstri beıbit zamanda dárigerlerdiń óz jumys ornynda ómirine qaýip tónip otyrýy — aqylǵa qonbaıtyn, múlde jol berýge bolmaıtyn jaǵdaı ekenin aıtty.
— Adam ómirin arashalap júrgen janǵa qol kóterý úshin adam qanshalyqty deńgeıde qatigez jáne meıirimsiz bolýy kerek? Beıbit ýaqytta dárigerlerdiń óz jumys ornynda ómirine qaýip tónip otyrýy — aqylǵa qonbaıtyn, múlde jol berýge bolmaıtyn jaǵdaı. Bul — tek bir dárigerge jasalǵan shabýyl emes. Bul — ondaǵan patsıenttiń qaraýsyz qalýy, ondaǵan operatsııanyń keıinge shegerilýi. Bul — búkil densaýlyq saqtaý júıesine tóngen tikeleı soqqy. Shabýyl jasalǵan qabyldaý bólimderi — onsyz da qaýpi joǵary aımaqtar, — dep atap ótti mınıstr.
DSM basshysy medıtsına qyzmetkerlerine jasalǵan shabýyl úshin jaýapkershilikti kúsheıtýge baǵyttalǵan zańnamalyq ózgerister bıylǵy qyrkúıekte Parlamentke engiziletinin alǵa tartty.
— Mundaı áreketterdi turmystyq qaqtyǵys retinde emes, qoǵamdyq qaýipsizdikke tóngen qaýip retinde baǵalaý qajet. Medıtsına qyzmetkerlerine qarsy zorlyq-zombylyqtyń jıilep ketýine baılanysty Іshki ister mınıstrimen birlesip, shuǵyl túrde ýrgenttik statsıonarlardyń, balalar jáne perınataldyq ortalyqtardyń qabyldaý bólimderinde táýlik boıy kúzet posttaryn kúsheıtý týraly sheshim qabyldandy. Barlyq medıtsınalyq uıym beınebaqylaý júıesimen, kúzetpen jáne dabyl batyrmalarymen qamtamasyz etilýi tıis, — dep túsindirdi Álnazarova.
Vedomstvo jetekshisi atap ótkendeı, japa shekken qostanaılyq dárigerdiń ómirin saqtaý úshin Densaýlyq saqtaý mınıstrligi barlyq qajetti ári batyl sharalardy qabyldaıtyn bolady.
— Erteń dáriger sanıtarııalyq avıatsııamen Ulttyq shuǵyl medıtsınany úılestirý ortalyǵyna jetkizilip, bilikti mamandardyń qatysýymen ári qaraı em qabyldaıdy, — dedi mınıstr.
Buǵan deıin habarlanǵandaı, Qostanaı oblystyq aýrýhanasynyń jedel járdem qabyldaý bóliminde naýqas hırýrgti soqqyǵa jyqty. Keıinnen zardap shekken dárigerdiń aty-jóni belgili boldy. Qazir hırýrg jansaqtaý bóliminde jatyr.