Mınıstr Bozymbaev kómir tapshylyǵyna jergilikti bılikti kinálady

ASTANA. QazAqparat - Búgin QR Energetıka mınıstrliginiń keńeıtilgen alqa májilisinen keıin vedomstvo basshysy Qanat Bozymbaev elimizde oryn alǵan kómir tapshylyǵyna qatysty pikir bildirdi, dep habarlaıdy QazAqparat.

«Jalpy Qazaqstanda kómir tapshylyǵy bolmaǵan. Ótken jyly óndirilgen kómir kólemi 8,6 paıyzǵa ósti. Tek osy kommýnaldyq kómirdiń ózi 18 paıyzǵa artty. Sondyqtan kómir tapshylyǵy elimizde bolǵan joq. Biraq, keıbir óńirlerde, aýdandarda kommýnaldyq kómirde tasymaldaý, halyqqa satýda máseleler týyndady», - degen mınıstr buǵan ákimshilikter jaýapty ekendigin basa aıtty.

Degenmen, onyń dereginshe, qańtar aıynda qatty aıaz bolýyna baılanysty shaǵyn jáne orta kenishterdiń kómir óndiretin gıdravlıkalyq jabdyqtary isten shyǵyp, 10 kúndeı jumys turyp qalǵan.

«Biraq, júıe quraýshy kásiporyndar jumystaryn jasady. Qańtar aıynda kómir óndirý 86 paıyz ǵana boldy. Biraq, búgingi kúni biz ótken jylǵy deńgeıge 100 paıyz shyqtyq. Máselen, óńirde, aýdan ortalyǵynda ne aýylǵa kómir jetpese onda tıisti ákimdikterden «kómir qaıda?» dep suraý kerek. Kómir Qazaqstanda jetkilikti. Ákimderden kómir kerek degen habar jetse, kenshiler sol kómirdi óndirip, temir jol arqyly  qýana-qýana jiberedi. Óıtkeni ol - bıznes, esh kedergi joq», - dedi Qanat Bozymbaev.