Mınıstr bolǵanymsha qoqysty suryptamaı tastaıtynmyn – Erlan Nysanbaev

ASTANA. KAZINFORM – QR Ekologııa jáne tabıǵı resýrstar mınıstri Erlan Nysanbaev óziniń qoqys suryptaý ádetteri týraly tilshiler suraǵyna jaýap berdi jáne bólek jınalǵan turmystyq qaldyqtar nege bir kólikke tıeletinin túsindirdi.

«Qazaqstandyqtar qoqysty bólek jınaıdy jáne eki túrli konteınerge tastaıdy. Biraq qoqys jınaıtyn kólik barlyǵyn birge tıep áketedi. Jalpy qoqys suryptaýdyń qajeti bar ma?», - dep surady tilshiler Úkimet otyrysynda ótken baspasóz máslıhatynda. 

«Men sizben kelisemin. Munda qoqysty bólek suryptaý ıdeıasy joqqa tán. Óıtkeni bári qarajatqa kelip tireledi. Qazir bir kólik bárin áketip júr, bólek áketý kerek bolsa qosymsha tehnıkalar qajet bolady. Bul bıznes úshin qosymsha júkteme bolyp otyr. Degenmen, bir kúni osyǵan birtindep kelemiz. Qoqysty bólek suryptaıtyn kompanııalardy yntalandyrýymyz kerek», - dep jaýap berdi Ekologııa mınıstri. 

Sonymen birge, tilshiler mınıstrdiń ózi turmysta qoqysty qalaı suryptaıtynyn surady. 

«Osy laýazymǵa kelgenge deıin qoqysty esh suryptamaı tastaıtynmyn. Qazir búkil otbasymyzben qaldyqtardy bólemiz. Biraq ókinishke qaraı, konteıner máselesi alańdatady. Bárimizge de qaldyqty durys bólýdi úırený kerek. Bul ár azamattyń ózinen bastalady», - dedi E. Nysanbaev.