Mınıstr Birtanov tegin dári-dármek máselesin tolyǵymen sheshýge ýáde etti

ASTANA. QazAqparat - QR Densaýlyq saqtaý mınıstri Eljan Birtanov kelesi jyldan bastap tegin dári-dármek máselesin sheshýdi kózdeıdi. Jyl saıyn ondaı preparattar myńdaǵan qazaqstandyqtarǵa jetpeı jatady, dep xabarlaıdy QazAqparat tilshisi. 

Mınıstrdiń aıtýynsha, búginde respýblıka boıynsha tegin preparattardyń 400-den astam túri bar. On jyl buryn dári-dármekterdiń ataýy 2,5 esege az bolǵan.

"Sonda biz jyl saıyn tegin dárilerdiń sanatyna jańa preparattardy qosyp otyramyz. Sońǵy bes jyldyń ishinde ondaı dári alatyn adamdardyń sany 2,5 mılıonnan 3,5 mıllıonǵa deıin ósti. Árıne, osy salaǵa bólinetin qarjynyń kólemi de artyp otyr. Ókinishke qaraı, memleket bekitken tizim boıynsha barlyq dáriler satyp alynbaıdy. Sebebi jergilikti bıýdjetterde aqsha tapshy. Sosyn tegin dárilerdi satyp alý merzimi de, baǵasy da ártúrli boldy", - dedi E.Birtanov Astanada ótken baspasóz máslıxatynda.

Onyń sózine qaraǵanda, ótken jyly qabyldanǵan zań aıasynda tegin dári-dármekti satyp alý sharalary biryńǵaı júıe boıynsha júrgizile bastady. Aǵymdaǵy jylda barlyq memlekettik satyp alýlar ashyq ótti. Sonyń nátıjesinde biraz aqsha únemdeldi.

"Ol aqshany bir qosymsha dári-dármek satyp alýǵa jumsaımyz. Sebebi aımaqtardan taǵy tapsyrystar túsip jatyr. Bıyl 34 mlrd teńge jetpeı qaldy. Únemdelgen aqsha soǵan jiberildi. Sondyqtan jyldyń aıaǵyna deıin barlyq preparattar tolyq kólemde satyp alynady. Árıne, sozylmaly aýrýy bar naýqastardyń barlyǵyn biryńǵaı bazaǵa qosqan mańyzdy. Retsepter de elektrondy túrde berilgeni jón. Sonda biz naqty suranysty kóre alamyz. Osy aıda biz 2019 jylǵa arnalǵan preparattardy satyp alýdy bastaımyz. Demek, jyldyń aıaǵyna deıin tegin dári-dármektiń bári emxanalar men dárixanalarǵa jetkiziletin bolady", - dep atap kórsetti E.Birtanov.

Aıta keteıik, baspasóz máslıxatynda mınıstr bosanǵan áıelderdiń ólimine sebep bolatyn negizgi máselelerdi atady.