Mınıstr Birtanov Aqtóbedegi ólim kórsetkishi joǵary aýrý túrlerin atady
Aqtóbege jumys saparymen kelgen Densaýlyq saqtaý mınıstri Eljan Birtanov oblystyq aýrýhanany, aýdandaǵy aýrýhana men emhana jumysyn qarap shyqty. Óńirde birneshe aýrý túrleri boıynsha ólim kórsetkishi artyp otyr. Mınıstr jańa emdeý oryndarynyń ashylýy jaǵdaıdy qalpyna keltiretinine senimdi.
«Bıyl Aqtóbede ana men bala óliminiń kórsetkishi ósip kele jatyr. Qurt aýrýy, qan qysymy derti arasynda da ólim kórsetkishi artty. Naýqastar sany da kóbeıdi. Sondyqtan qajetti sharalar engizý kerek. Oblysqa 8 akýsher-gınekolog, 14 reanımatolog qajet. Jas mamandarǵa áleýmettik qoldaý kórsetken jón. Jańadan salynyp jatqan perınataldyq ortalyq pen týberkýlezge qarsy kúres dıspanseri iske qosylsa, osy máseleler sheshiledi degen oıdamyz»,- dedi Densaýlyq saqtaý mınıstri Eljan Birtanov.
Aıta keteıik, bıyl Aqtóbede densaýlyq saqtaý salasyn qarjylandyrý artyp, 30 mıllıard teńgege jetti. Óńirde jekemenshik medıtsınalyq ortalyqtar sany da artyp otyr. Aldaǵy ýaqytta barlyq aýdandaǵy jedel járdem bir dıspetcherlik ortalyqqa baǵynady. Medıtsına salasyn tsıfrlandyrý da basty mindetke aınaldy.
«Oblystaǵy medıtsınalyq mekemelerdi kompıýtermen qamtamasyz etý 95 paıyzdy qurap otyr. Jyl aıaǵyna deıin 100 paıyz bolyp, qaǵazsyz jumys isteımiz»,- dedi E.Birtanov.