Mınıstr: Bıologııa, ınformatıka, aǵylshyn, qazaq tili muǵalimderi álsiz

ASTANA. KAZINFORM – Oqý-aǵartý mınıstri Ǵanı Beısembaev vedomstvonyń alqa májilisinde qaı pánderdiń muǵalimderi álsiz ekenin aıtty.

- Pedagogterdiń bilimin baǵalaý nátıjelerine súıensek, joǵary oqý oryndarynyń túlekterin daıarlaý deńgeıi óńirler arasynda da, ózderiniń ishinde de aıtarlyqtaı ózgerip otyrady. 7 653 túlektiń 45%-y ǵana 50%-dyq shekti deńgeıden óte aldy. «Maqsatty mektepter» jobasy aıasynda bıologııa, ınformatıka, aǵylshyn jáne qazaq tilderi boıynsha jumys istep júrgen pedagogterdiń álsiz jaqtary anyqtaldy. Bul pándik bilimdegi eleýli olqylyqtardy kórsetedi jáne pedagogıkalyq mamandyqtar boıynsha daıarlaýdy júrgizetin joǵary oqý oryndarynyń bilim berý baǵdarlamalaryn dereý qaıta qaraýdy talap etedi, - dedi Ǵanı Beısembaev.

Sondaı-aq, ol biliktilikti arttyrý kýrstaryna reforma jasaýdy tapsyrdy.

- «Órleýge» pedagogıkalyq joǵary oqý oryndarymen birlese otyryp, biliktilikti arttyrý kýrstarynyń baǵdarlamalaryn túbegeıli qaıta qaraýdy tapsyramyn. Olar pedagogtiń jeke suranystaryna beıimdelip, ıkemdi bolýy tıis. Taǵy bir aıryqsha nazar aýdaratyn másele – pedagogıkalyq etıka. Pedagogterdiń bilimin baǵalaýdan ótý kezinde attestattaý qaǵıdalaryn buzǵan 346 pedagogtiń nátıjeleri joıyldy, - dedi Ǵanı Beısembaev.

Aıta ketý kerek, 2026 jyly keıbir mektepterde oqý pánderi biriktirilýi múmkin.

Sondaı-aq eldegi 740 mektepke dırektor kerek ekendigi týraly jazǵan bolatynbyz.