Mınıstr bilim salasyndaǵy bastamalardy oqytýshylarmen talqylaýy tıis - N.Nazarbaev

ASTANA. QazAqparat - Bilim salasyndaǵy bastamalar jan-jaqty talqylaýdan keıin ǵana mektep baǵdarlamasyna engizilýi tıis. Búgin «Táýelsizdik. Kelisim. Bolashaǵy birtutas ult» kún tártibimen ótip jatqan Qazaqstan halqy Assambleıasynyń XXIV sessııasynda Elbasy Nursultan Nazarbaev osylaı dedi.

«Halyqqa ashyq Úkimetti túsindirý jumystary aqsap jatyr. Biz óndiretin, jasaıtyn isterdi halyqqa túsindirý qajet. Barlyǵy birdeı keshke qaraı teledıdar aldynda otyrmaıdy, olarǵa jumys isteý kerek. Barlyǵy birdeı gazet te oqymaıdy. Bizde «Nur Otan» partııasy, Assambleıa, jergilikti atqarýshy organdar bar. Olar aýyldarda, aýdandarda munyń ne úshin qabyldanǵanyn túsindirýi kerek», - dedi Elbasy.
Osy rette QR Prezıdenti bes kúndik oqý, úsh tilde bilim berýdi qosa alǵanda mekteptegi bilim salasyna qatysty bastamalardyń keńinen talqylanyp jatqanyn aıtty.
«Bilim mınıstrligi eń aldymen bul máselelerdi oqytýshylarmen talqylaýy tıis. Máselen, men balalarymyzǵa júkteme tym artyq dep sanaımyn. 5 kúndik bilim berýdi qysqartý esebinen jasaý qajet. Máselen, qazaq tili men ádebıetin bir pán jasaýǵa, orys tili grammatıkasy men ádebıetin, tarıh pen geografııany qosýǵa bolatyn shyǵar», - dedi Memleket basshysy.
Sonymen qatar, Elbasy bilim salasyndaǵy bul ózgerister balalarymyzdyń, elimizdiń bolashaǵy úshin asa qajet ekendigin atap ótti.
«Buǵan qosa, barlyǵy da tyńǵylyqty talqylaýdan keıin qabyldanýy tıis. Mektep máselesiniń árbir otbasyna qatysty bar. Sondyqtan, barlyq pozıtsııa aıtylýy tıis. Oılastyrylmaǵan eksperımentke jol joq. Bizdi eshkim de asyqtyryp otyrǵan joq. Biz ne qajet ekendigin ózimiz sheshemiz», - dedi Elbasy.