Mınıstr Berik Kamalıev áýejaılar basshylarynyń aldyna naqty mindetter qoıdy
ASTANA. 27 shilde. QazAqparat - QR kólik jáne kommýnıkatsııa mınıstri Berik Kamalıev respýblıka áýejaılarynyń basshylarmen áýejaılar ınfraqurylymdaryn damytý jáne avıatsııalyq qaýpsizdik máseleleri jóninde májilis ótkizdi.
Májiliske «Eır Astana», «Skat» jáne «Evro-Azııa Eır» avıakompanııalarynyń, «Samuryq-Qazyna» UQQ» AQ, sonymen birge múddeli quqyq qorǵaý organdarynyń ókilderi shaqyryldy, dep habarlaıdy vedomstvonyń baspasóz qyzmeti.
Kólik vedomstvosynyń basshysy áýejaılardaǵy avıatsııalyq qaýipsizdikti qamtamasyz etý máselelerine, onyń ishinde jolaýshylar men bagajdy tekserýge arnalǵan tehnıkalyq quraldarmen, jarylǵysh zattardy izdeý jáne tabýǵa arnalǵan qazirgi zamanǵy jabdyqpen jaraqtandyrý, avıatsııalyq qaýipsizdik qyzmetiniń tekserýge arnalǵan tehnıkalyq quraldaryn sertıfıkattaý, sonymen birge osy qyzmet qyzmetkerleriniń kásibı daıyndaý máselelerine arnaıy toqtaldy.
Mınıstrlik elimizdegi áýejaılardy damytý jóninde birshama jumystar atqaryp keledi. Aıtalyq, keıingi bes jylda 6 áýejaıda (Almaty, Aqtóbe, Aqtaý, Pavlodar, Qyzylorda, Shymkent) áýejaı nysandary qaıta jóndeldi, nemese jańadan salyndy. Osy maqsattaǵy ınvestıtsııalardyń jalpy kólemi 25 mlrd. teńgeni qurady, onyń 13,5 mlrd. teńgesi respýblıkalyq bıýdjetten bólindi.
Sonymen birge, mınıstr munymen qosa áli de sheshilmegen máseleler az emes, soǵan baılanysty óńirlik áýejaılardyń ınfraqurylymdaryn qaıta salý, áýe kemeleri men jolaýshylarǵa qyzmet kórsetetin arnaıy tehnıkany jańartý, kórsetiletin áýejaılyq qyzmettiń sapasyna erekshe mán berý qajettigin basa aıtty.
B.Kamalıev jınalǵandarǵa aǵymdaǵy jylǵy 3 maýsymda Astana qalasyn damytý máselelerin talqylaý jónindegi otyrys kezinde Elbasy N.Nazarbaevtyń «Eır Astana» áýe kompanııasy reısteriniń kidiristerine baılanysty syn eskertýlerin jáne osy máseleni sheshý jónindegi tapsyrmasyn eske saldy.
Mınıstr bul baǵytta birshama jumystar atqarylǵanyn atap ótti. Almaty jáne Astana áýejaılarynda reısterdiń kúndelikti monıtorıngin júrgizetin operatıvti shtab quryldy, Almaty-Astana marshrýty boıynsha balama áýekompanııalardyń reısteri kóbeıtildi, «Eır Astana» áýe kompanııasynyń jańa áýe kemelerin satyp alý jospary jasaldy. Sondaı-aq, áýe kompanııalary men áýejaılardyń basshylarynyń ákimshilik jaýapkershiligi qataıtyldy. Osyǵan oraı, Ákimshilik quqyq buzýshylyq týraly Kodekske sáıkesinshe ózgerister engizilýde.
Alaıda, áli de ushýdyń turaqtylyǵyn qamtamasyz etý máselesi ózekti bolyp otyr.
Talqylanǵan máseleler boıynsha áýejaılardyń ıeleri men basshylary, sonymen birge quqyq qorǵaý organdarynyń basshylary sóz sóıledi.
Májilistiń qorytyndysy boıynsha mınıstr B.Kamalıev ushý qaýipsizdigin qamtamasyz etý, osy májiliste atalǵan eskertýlerdi eskere otyryp, áýejaılardyń qyzmet kórsetýin jaqsartý jóninde naqty sharalar men oryndaý merzimderin belgiledi, áýejaı ıelerine áýejaılardy 2014 jylǵa deıin damytý jóninde perspektıvalyq jospar jasaý, olardyń qarjylandyrý kózderin kórsetýdi tapsyrdy.
