Mınıstr «Baıqońyrda» kabeldiń urlanǵanyn rastady

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev «Baıqońyr» ǵarysh aılaǵy aýmaǵynda kabel urlanǵandyǵyn rastady, dep habarlaıdy QazAqparat tilshisi.

Aıta keteıik, Májilistiń jalpy otyrysynda depýtat Snejanna Imasheva «Baıqońyr» ǵarysh aılaǵy aýmaǵynda uzyndyǵy 2,5 shaqyrym kabel urlanǵandyǵy týraly aqparat taraǵanyn aıtty. Osy oraıda ol ǵarysh aılaǵy nysandaryn qorǵaý boıynsha jumystardyń atqarylý barysy týraly surady.

«Shyn máninde mundaı fakti boldy. Qylmystyq is ashylyp, quqyq qorǵaý organdary bul máseleni qarastyrýda. Onyń qorytyndysy boıynsha tıisti sheshim shyǵarylady. Búginde atalǵan nysan boıynsha jumys isteıtin kúzet kompanııasy keltirilgen shyǵyndy óteıtinin málimdedi», - dedi A. Jumaǵalıev Parlament Májilisiniń jalpy otyrysynda depýtat saýalyna jaýap bere otyryp.

«Barsha perımetrdi qamtıtyndaı kameralardy ornatý boıynsha jumys júrgizilýde. Sonymen qatar barsha qorshaýdy qalpyna keltirý sharalary atqarylýda», - dedi mınıstr.

Óz kezeginde Qarjy mınıstriniń birinshi orynbasary Berik Sholpanqulov «Baıqońyrda» múliktiń saqtalýyna reseılik tarap jaýapty ekenin, al qazaqstandyq «Baıqońyr balans» uıymy paıdalaný talaptaryna baqylap, esep-qısap jáne monıtorıng sharalaryn júrgizetenin atap ótti.