Mınıstr BAQ ókilderine jasalǵan shabýyldar jaıynda: Biz árdaıym jýrnalıster jaǵyndamyz

ASTANA. QazAqparat – Aqparat jáne qoǵamdyq damý mınıstri Darhan Qydyráli Úkimet otyrysynan keıin BAQ ókilderine jasalǵan túrli shabýyldar týraly pikir bildirdi, dep habarlaıdy QazAqparat tilshisi.

«Qyrkúıek aıynan beri 6 ret arnaıy málimdeme jasadym. Aqtóbedegi oqıǵadan bastap jýrnalısterdiń quqyǵyn qorǵaýǵa, olarǵa árdaıym qoldaý kórsetýge daıyn ekenimizdi aıttyq. Ol týraly áleýmettik jelide de, jeke óz akkaýnttarymda da baıandadym. Sonymen qatar, ol jýrnalıstermen kezedstim, sóılestim. Mysaly, Samal Ibraevamen áńgimelestik. Sol sııaqty Gúljan Erǵalıevamen kezdesip, basqalarǵa da qoldaý kórsetýge ázir ekenimizdi jetkizdik. Memleket basshysy arnaıy tapsyrma berdi. Sol boıynsha keıbir kúdiktiler ustalyp jatyr. Sondyqtan óz baqylaýymyzda ustap otyrmyz. Ár ýaqytta jýrnalısterdiń jaǵynda jáne olardy qoldaýǵa ázir ekenimdi taǵy da aıtqym keledi», - dedi ol.

Mınıstr jýrnalıst Dınara Egeýbaevaǵa jasalǵan shabýyldyń tapsyrys berýshileri týraly da paıymyn aıtty.

«Ol boıynsha qazir tergeý júrip jatyr. Jaqynda qorytyndysy aıtylady dep oılaımyn. Jalpy 5 adamdy tapty. Biraq olarǵa tapsyrys berýshi kim? Bul jóninde Memleket basshysy da anyqtap aıtty. Tek qana oryndaýshylar emes, bularǵa tapsyrys berýshilerdi de anyqtaý kerek. Munymen quqyq qorǵaý organdary aınalysady. Sondyqtan jaqynda jaýabyn bilesizder dep oılaımyn», - dedi Darhan Qydyráli.

Eske sala keteıik, Memleket basshysy jýrnalısterge qarsy baǵyttalǵan qylmystardy muqııat tergeýdi tapsyrǵan bolatyn.

Foto: ortcom.kz