Mınıstr BAQ ókilderine «Aqparat salasynyń úzdigi» tósbelgisin tabystady

NUR-SULTAN. QazAqparat – Aqparat jáne qoǵamdyq damý mınıstri Aıda Balaeva birqatar BAQ ókilderine «Aqparat salasynyń úzdigi» tósbelgisin tabystady, dep habarlaıdy QazAqparat tilshisi.

BAQ qyzmetkerleri kúnine oraı ótken saltanatty jıynda atalǵan tósbelgi «Qazaqstan» ulttyq arnasy efır saıasaty anons bóliminiń jetekshisi Maqpal Úkenovaǵa, «Habar 24» telearnasy jańalyqtar bóliminiń tilshisi Qanat Bazylhanovqa, «Aıqyn» gazetiniń fototilshisi Aıtjan Murzanovqa «Kazahstanskaıa pravda» gazeti sport bóliminiń redaktory Asqar Beısenbaevqa, sondaı-aq Qazmedıa otalyǵy bas dırektorynyń orynbasary Raıhan Ábdeshevaǵa tabystaldy.

Aıta keteıik, «Aqparat salasynyń úzdigi» tósbelgisimen elimizdiń óńirlerindegi sala mamandary marapattalady. Osy oraıda otandyq jýrnalıstıkanyń damýyna úles qosqan jáne eńbek ótili 30 jyldan asqan shyn kásibı mamandar qamtylǵan. Mereke qarsańynda buqaralyq aqparat quraldary salasynyń 55 qyzmetkeri erekshe tósbelgi ıesi atandy.

Budan buryn habarlanǵandaı, Aqparat jáne qoǵamdyq damý mınıstri Aıda Balaeva BAQ qyzmetkerlerin kásibı merekesimen quttyqtady.

Sonymen qatar, búgingi saltanatty jıynda tanymal jýrnalıst Beısen Quranbek atyndaǵy «Jiger» syılyǵynyń jeńimpazdary marapattaldy.