Mınıstr Aımaǵambetov: Úzdiksiz oqý tujyrymdamasyn ázirlep jatyrmyz

NUR-SULTAN. QazAqparat - Qazaqstanda úzdiksiz oqý tujyrymdamasy ázirlenip jatyr. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«PIAAC zertteýine biz birinshi ret qatysyp otyrmyz. Al negizgi qatysýshylary damyǵan memleketter ekeni belgili. Biraq, Qazaqstan ádeıi qatysty. Bizge osy problemalardy belgilep alý mańyzdy. Keı memleketter mundaı zertteýge tek astanalaryn ne iri qalalaryn qatystyrady. Biz aýyldyń da, qalanyń da turǵyndaryn tıisti ádisteme boıynsha birdeı nátıje alý úshin qatystyrdyq. Sondyqtan bul naqty nátıje sanalady», - dedi Ashat Aımaǵambetov mınıstrliktiń apparat keńesi barysynda.

Sonymen qatar ol elimizde úzdiksiz oqý tujyrymdamasy ázirlenip jatqanyn aıtty

«Aýrýyn jasyrǵanǵa ne bolatynyn bilemiz. Sondyqtan osyndaı problemalardy tanyp, olar boıynsha naqty sheshimder qabyldaý biz úshin óte mańyzdy. Sol sebepti osyndaı apparat keńesterinde halyqaralyq zertteýlerdiń nátıjelerin, ásirese salystyrmaly zertteýlerdiń saraptamalyq aqparattaryn berip otyramyz. Mundaı aqparat naqty sheshim qabyldaý úshin qozǵalady. Ómir boıy oqý, úzdiksiz oqý tujyrymdamasyn daıyndaý boıynsha Memleket basshysy Qasym-Jomart Toqaev óz Joldaýynda beker aıtqan joq. Bul biz úshin mańyzdy máseleniń biri. Qosymsha bilim berýdi damytý, jalpy úzdiksiz oqý máselesin damytý, formaldy emes bilim berý nátıjelerin taný óte mańyzdy bolyp otyr. Sondyqtan biz atalǵan tujyrymdamany daıyndap jatyrmyz», - dedi ol.

Mınıstrdiń aıtýynsha, tujyrymdamany daıyndaý jumysyna joǵary oqý oryndary, ǵylymı-zertteý ınstıtýttary belsene qatysýy kerek.

Aıta keterligi, atalǵan keńeste «Aqparattyq-saraptamalyq ortalyq» AQ prezıdenti Erlan Shýlanov PIAAC zertteýiniń qorytyndysymen tanystyrǵan bolatyn.