Mınıstr Aıagózdegi oqıǵaǵa qatysty: Tıisti shara qabyldanady
NUR-SULTAN. QazAqparat – Bilim jáne ǵylym mınıstri Ashat Aımaǵambetov Qazaqstandaǵy arnaıy áleýmettik ortalyq pen balalar úıiniń bári keshendi tekseristen ótetinin málim etti, dep habarlaıdy QazAqparat tilshisi.
«Balalardyń quqyǵyn qorǵaý boıynsha respýblıkalyq komıssııa otyrysynda biraz másele aıtyldy. Naqty Aıagózde bolǵan máselege qatysty máselelerdi kóterdik. Biraq soǵan qaramastan bizdiń aqparatymyzǵa sáıkes, biraz óńirde ártúrli keleńsiz jaǵdaı áli de jalǵasýda. Mundaıǵa endi taǵy jol bermeý kerek. Óńirlerdegi balalardyń quqyqtaryn qorǵaý boıynsha komıssııalardyń jumysynyń tıimdiligi óte tómen. Bul máselege kóńil aýdarý kerek. Komıssııa otyrysynda qabyldanǵan sheshimge sáıkes respýblıkadaǵy balalar úıine, áleýmettik ortalyqtarǵa, basqa da uıymdarǵa úlken keshendi tekseris ótkizetin bolamyz. Sonyń nátıjesinde tıisti shara qabyldanady», - dedi Ashat Aımaǵambetov Bilim jáne ǵylym mınıstrliginiń apparattyq otyrysynda.
Esterińizge sala ketsek, osyǵan deıin Aıagózdegi áleýmettik kómek ortalyǵynda 4 balanyń qaıtys bolǵandyǵy habarlandy.
QR Іshki ister mınıstrligi istiń tergelýin óz baqylaýyna aldy. Osy oqıǵadan keıin QR Eńbek jáne halyqty áleýmettik qorǵaý mınıstrligi elimizdiń ár óńirinde ornalasqan medıtsınalyq-áleýmettik kómek kórsetetin 113 mekemege tekserý júrgiziletinin málim etti. Onyń ishinde Aıagózdegi balalarǵa arnalǵan arnaıy áleýmettik kómek ortalyǵy bar. Al vedomstvoaralyq komıssııa otyrysynda Qazaqstandaǵy adam quqyqtary jónindegi ýákil Elvıra Ázimova arnaıy áleýmettik kómek ortalyǵynda kóptegen kemshilikti ataǵan edi.
