Mınıstr aýyl sharýashylyǵyndaǵy sýbsıdııa máselesine túsinik berdi
NUR-SULTAN. QazAqparat - Aýyl sharýashylyǵy mınıstri Saparhan Omarov sýbsıdııa salasynda kóterilip júrgen máselege jaýap berdi, dep habarlaıdy QazAqparat tilshisi.
«Memlekettik qoldaý sharalarynyń turaqtylyǵy máselesine toqtalsaq, shynynda da bul taqyryp kópten beri kóterilip kele jatyr. Taldaýǵa súıensek, sýbsıdııalaý jóninde 5 jyl ishinde ózgerister men tolyqtyrýlar 47 ret engizilipti. Aıta keteý kerek, onyń barlyǵy Úkimettiń nemese mınıstrliktiń tarapynan ǵana engizildi dep aıtýǵa bolmaıdy, bul ózgertýler osyndaı talqylaýlar kezinde, fermerlerdiń bergen usynysy negizinde eskerildi. Ár sýbsıdııalaý qaǵıdasyna pasport jasalady, bul ózgeristerdiń kóbisi sol pasporttarǵa engizilgen», - dedi mınıstr Senatta agroónerkásiptik keshendi damytý taqyrybyna arnalǵan parlamenttik tyńdaýda.
Sonymen qatar S. Omarov bul sala boıynsha Memleket basshysy Aýyl sharýashylyǵy mınıstrligine tıisti tapsyrma bergenin, sonyń aıasynda qajetti qadamdar jasalyp jatqanyn atap ótti.
«Biz Dúnıejúzilik saýda uıymynyń (DSU) saralaýy boıynsha Jasyl sebetke kiretin memlekettik qoldaý sharalaryn (ónim baǵasyn burmalamaıtyn sýbsıdııalar) zańnamalyq deńgeıde 5 jylǵa turaqtandyrý normasyn engizýdi josparlap otyrmyz», - dedi vedomstvo basshysy.
S. Omarov tıisti túzetýler ázirlengenin, endi Májilis pen Senat depýtattarynan olardy qarastyrý men bastamashylyq etýde qoldaý kórsetýdi surady.
«Sýbsıdııalaý qaǵıdalarynyń jıi ózgeriske ushyraýy agroónerkásiptik keshen salasynyń jete qarjylandyrylmaýy máselesimen de baılanysty. ıAǵnı, qarajat jetispeı qalady da, sýbsıdııalardyń bıýdjetterin qaıta josparlaýǵa týra kelip jatady. Qazir jyl saıyn sýbsıdııalaýǵa shamamen 300 mlrd teńge bólinedi, bul rette sýbsıdııalarǵa qosymsha qajettilik 100 mlrd teńge shamasynda dep baǵalanady», - dedi mınıstr.
«Óńirler arasynda sýbsıdııa somalarynyń aýytqýyna keler bolsaq, bul problema sheshimin tapty. Bıýdjet zańnamasyna ózgerister engizilip, aldaǵy «úshjyldyqqa» (2020-2022 jyldar) aýyl sharýashylyǵyn damytýǵa arnalǵan jalpy sıpattaǵy transfertter burynǵydaı óńirdiń halyq sanyna baılanysty emes, óńirdiń aýyl sharýashylyǵy jalpy ónimindegi úlesine qatysty esepteldi. Sondaı-aq aýyl sharýashylyǵyn qoldaýǵa arnalǵan shyǵystardyń eń az kólemi kózdeldi, bul ákimdikterge qarajatty óńirdi damytýdyń basqa da maqsattaryna jumsaýǵa múmkindik bermeıdi», - dedi Saparhan Omarov.
Budan buryn habarlanǵandaı, senator Dúısenǵazy Mýsın aýyl sharýashylyǵynda sýbsıdııalaý erejeleriniń jıi ózgerýi salanyń damýyna keri áserin tıgizip jatqanyn aıtty.
