Mınıstr aýyssa, dırektor aýysady — Abaı ulttyq mektebine baılanysty túlekter másele kóterdi

Mektep túlekteri bilim ordasynyń búgingi jaǵdaıyna alańdaýshylyq bildirdi. Olar óz shaǵymdaryn jetkizý úshin ulttyq mektepke arnaıy baryp, BAQ ókilderimen tildesti.

Túlekterdiń aıtýynsha, shilde aıynyń basynda bilim ordasynyń dırektory qyzmetinen ketkennen keıin jańa basshysy taǵaıyndalmaǵan. Sondaı-aq dırektor orynbasarlarynyń oryndary bos turǵan. Jańa oqý jylyn ulttyq mektep basshylyq quramsyz bastaǵan. Sonyń saldarynan mektepte ne oqý baǵdarlamasy ne sabaq kestesi bekitilmegen. Bıyl kóktemde qoldanysqa berilgen mekteptiń aýmaǵynda jasyl jelek kútimsiz qalyp, sarǵaıyp ketken.

— Men bul mekteppen 6-7 jyldaı tyǵyz baılanystamyn. Óıtkeni túlek retinde árdaıym qoldaý kórsetip turamyz. Biraq keıingi 5 jyldyń ishinde 4 dırektor aýysty. Mınıstr aýyssa, bul jerde dırektor aýysady. Mektepten baılanys ornatyp, endi birdeńe isteımiz degende jumysymyz zaıa ketedi. Qaıtadan basqa kisi keledi, — dedi mektep túlegi Raýan Oqas.

Sondaı-aq ol Oqý-aǵartý mınıstrligi mekteptegi qarjylyq buzýshylyqtar týraly jarııalaǵan aqparatta burmalaý bar ekenin aıtty.

— 10,8 mlrd teńgege buzýshylyqtar týraly habarlamadan munda bári aqsha jymqyryp otqandaı oı qalyptasty. Negizinen bul — mektep jeri men nysandary balansqa ótpeýi ǵana bolatyn. Ulttyq mektepke kúıe jaǵý kimge qajet boldy? Osyndaı aqparattyń saldarynan oqýǵa túsip turǵan 30-ǵa jýyq bala kelmeı qaldy. Óıtkeni ata-ana balasy úshin alańdady. Ulttyq statýsy bar mektepke durys kóńil aýdarý kerek, — dedi ol.

Mektepke túlektermen birge kelgen Qazaqstannyń eńbek sińirgen qaıratkeri, ardager ustaz Orynsha Qarabalına mektep tóńiregindegi jaǵdaıǵa alańdaýshylyǵyn bildirdi.

— Osy mektepte 40 jyldaı sabaq berdim. Bul jerden Keńes Dúısekeev, Máýlen Áshimbaev, Darhan Qydyráli, general-leıtenant Ádil Shaıahmetovter shyqqan. Mundaı mektepke dırektor bolmaı jatyr. Ony men túsinbedim. Shynynda keıingi kezde birneshe dırektor birinen keıin biri aýysty. Onyń sebebi qandaı? — dedi ustaz.

Mektepke aldynda jınalǵan toppen Oqý-aǵartý vıtse-mınıstri Jaıyq Sharabasov kezdesip, qalyptasqan jaǵdaıǵa baılanysty pikir bildirdi. Onyń aıtýynsha, qazir bilim ordasynda oqý protsesi bári turaqty túrde júrip jatyr. Dırektordyń oqý isteri jónindegi orynbasary keshe taǵaıyndalǵan. Ózge orynbasarlary men dırektor aldaǵy ýaqytta taǵaıyndalatyn bolady.

— Aldyńǵy dırektor qyzmetinen ketken kezde onyń qyzmetin mindetin atqarýshy retinde orynbasary aldy. Jazda memlekettik qyzmet týraly zań qabyldandy. Ol boıynsha vedomstvaǵa qarasty uıymdardyń basshylary konkýrs arqyly arnaıy talaptarǵa sáıkes taǵaıyndalady. Biraq bul talaptar áli bekitilgen joq. Sondyqtan qazirge deıin dırektor taǵaıyndaý boıynsha konkýrs ótkizilmedi, — dedi ol.

Vıtse-mınıstr bilim ordasynyń tóńiregindegi barlyq másele eki apta ishinde sheshiletinin aıtty. Onyń sózinshe, bul jaǵdaı Oqý-aǵartý mınıstrdiń tikeleı baqylaýynda.

Odan bólek Jaıyq Sharabasov 10 mlrd teńge buzýshylyqtar týraly aqparatqa túsinikteme berdi.

— Mundaǵy 10 mlrd teńge — bul mekteptiń quny. Nysan paıdalanýǵa berilgen kezde mektep basshylyǵy ony balansqa qabyldaý qajet edi. Alaıda aldyńǵy dırektor ony qabyldamaǵan. Sondyqtan qazir jasyl jelek qýrap qalǵan, avtosýarý júıesi jumys istemeıdi. Mınıstrlik tarapynan aýdıt kelgennen keıin ǵana ol balansqa qabyldandy, — dedi vıtse-mınıstr.

Eske salaıyq, keshe Oqý-aǵartý mınıstrligi «Abaı ulttyq mektebindegi» jaǵdaıǵa túsinikteme berdi.