Mınıstr aýyl sharýashylyǵyndaǵy burmalanǵan derekterdi jarııalady
ASTANA. KAZINFORM – Biraz jyldar boıy mal sharýashylyǵynda da, ósimdik sharýashylyǵynda da statıstıkalyq derekter burmalanyp kelgen. Bul týraly Parlament Májilisinde mal sharýashylyǵy ónimderin tereń óńdeý taqyrybyna arnalǵan Úkimet saǵatynda Aýyl sharýashylyǵy mınıstri Aıdarbek Saparov aıtty.
«Birinshiden, shıkizattyń jetispeýi men qambat bolýy máselesi bar. Statıstıkaǵa sáıkes, mal sharýashylyǵyndaǵy shıkizat jetkilikti bolǵanymen, derekter naqty jaǵdaıǵa sáıkes kelmeıtinin túsinemiz. Máselen, resmı statıstıkaǵa sáıkes jyl saıyn shamamen 6,5 mıllıon tonna sút óndiriledi, biraq onyń tek 2,1 mıllıon tonnasy 180 kásiporynda óńdeledi. Sonda, súttiń mundaı kólemi bolǵan kezde, ne sebepti óńdeýge shıkizat jetkiliksiz?! Bul fakt mal sharýashylyǵynda da, ósimdik sharýashylyǵynda da statıstıkalyq derekterdi burmalaýdyń kóp jyldyq tájirıbesiniń bolýymen túsindiriledi», - dedi A. Saparov.
Onyń aıtýynsha, osy másele boıynsha Premer-Mınıstrdiń orynbasary Serik Jumanǵarınniń tóraǵalyǵymen statıstıkalyq derekterdi qaıta qaraý jóninde arnaıy jumys toby quryldy.
«Komıssııa atqarǵan jumystyń nátıjesinde 2 mln bas mal men 3 mln tonna sút esepten shyǵaryldy. Ósimdik sharýashylyǵynda jumys jalǵasyp jatyr», - dedi mınıstr.
Buǵan deıin habarlanǵandaı, Májilis depýtatY Serik Egizbaev ımporttyń ósýinen et pen sút ónimderinen jylda 800 mln dollar joǵaltyp jatqanymyzdy aıtty.
