Mınıstr Atyraýdyń turǵyn úı lıftindegi qaıǵyly oqıǵaǵa pikir bildirdi
ASTANA. QazAqparat - QR Investıtsııalar jáne damý mınıstri Jeńis Qasymbek Atyraýda lıft shahtasynda jasóspirimderdiń qaza tabý oqıǵasyna qatysty pikir bildirdi, dep habarlaıdy QazAqparat.
«Ol jerde 14 jáne 15 jastaǵy eki jasóspirim boldy. Bul lıft turǵyn úıde jabyq turǵan. Bizdiń mınıstrlikke qarasty komıtet óndiristegi lıftilerdiń tetikterine jaýapty. Al turǵyn úılerge qatystylar oblys ákimdikteriniń jaýapkershiliginde. Degenmen de bolǵan oqıǵaǵa baılanysty Atyraý oblysy ákimdigimen bul máseleni qarastyryp jatyrmyz. Lıfti jabyq turǵan, balalar qandaı sebeptermen lıftige kirgendigi tekserilýde. Qazirgi kezde ákimdik bólek komıssııa qurdy, biz óz tarapymyzdan qoldaý sharalaryn jasap jatyrmyz», - dep atap ótti mınıstr Parlamentte tilshilerdiń saýalyna jaýap bere otyryp.
Osy oraıda, J. Qasymbek komıssııa atalǵan qaıǵyly oqıǵa boıynsha kinálilerdi anyqtaıtynyn atap ótti.
Esterińizge sala keteıik, qaıǵyly jaǵdaı Almagúl shaǵyn aýdanyndaǵy №19 úıde 21 mamyr kúni keshkisin bolǵan. 14 jastaǵy eki jasóspirim 15-qabatta jumys istemeı turǵan júk tasıtyn lıftiniń esigine kirgen. Sol sátte ekeýi de shahtaǵa qulap ketken. Olardyń biri oqıǵa ornynda kóz jumdy. Ekinshisi aýrýhanada qaıtys boldy.
Qaıǵyly oqıǵa bolǵan úıdegi júk lıftisine 2012 jyly demontaj jasalǵan, esikteri dánekerlengen. Oqıǵaǵa qatysty tergeý amaldary bastaldy.
