Mınıstr Atyraý oblysyndaǵy medıtsınalyq qyzmetpen nashar qamtylǵan eldi mekenderdi atady
«Respýblıkalyq komıssııa jumysynyń aıasynda Almaly, Berekeli eldi mekenderine barǵanda keleshegi bar, perspektıvaly aýyldarda durys medıtsınalyq ǵımarattardyń joqtyǵy baıqaldy. Medıtsına qyzmetkerlerine, ásirese dárigerlerge, halyqqa da jaǵdaıdyń jasalmaǵany kózge tústi. Ákimdiktiń aqparaty boıynsha, búgingi tańda osy mekemelerdi salý úshin tıisti qujattar ázirlenýde. Kelesi jyldan bastap atalǵan eldi mekenderde medıtsınalyq uıymdar salý josparlanyp otyr», - dedi mınıstr Atyraý oblysynyń Óńirlik kommýnıkatsııalar qyzmetinde ótken baspasóz konferentsııasynda.
Ajar Ǵınııattyń málimetine qaraǵanda, Atyraý oblysynyń ákimdigi 2026 jylǵa deıin halyqtyń qajettiligin óteıtin 19 medıtsınalyq-sanıtarlyq alǵashqy kómek obektisin qoldanysqa berýdi josparlap otyr.
«Onyń ishinde bıyl 7 obekt: Qurmanǵazy aýdanynyń Qadyrka aýylynda medıtsınalyq beket, Mahambet aýdanynyń Eńbekshil aýylynda medıtsınalyq beket, Isataı aýdanynyń Aqqystaý aýylynda feldsherlik-ambýlatorııalyq beket, Atyraý qalasynyń Bereke shaǵyn aýdanynda dárigerlik ambýlatorııa, Jylyoı aýdanyndaǵy Jańa Qaraton aýylynda dárigerlik ambýlatorııa, Atyraý qalasynyń Qara depo shaǵyn aýdanynda dárigerlik ambýlatorııa qurylysy júrip jatyr. Keıbir nysandar tipti salynyp bitýge jaqyn», - dedi vedomstvo basshysy.
