Mınıstr atom energııasyn paıdalanýda zańnamalyq ózgerister ne úshin kerektigin túsindirdi

NUR-SULTAN. QazAqparat – Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine atom energııasyn paıdalaný salasyndaǵy azamattyq-quqyqtyq jaýaptylyq máseleleri boıynsha ózgeris pen tolyqtyrýlar engizý týraly» zań jobasyn maquldady, dep habarlaıdy QazAqparat tilshisi.

«Zań jobasynyń retteý máni – Qazaqstan Respýblıkasynda ıadrolyq qondyrǵylardyń jumys isteýi protsesinde týyndaıtyn, atap aıtqanda ıadrolyq qondyrǵy operatorlarynyń ıadrolyq zalal keltirgeni úshin azamattyq-quqyqtyq jaýaptylyǵy salasyndaǵy qoǵamdyq qatynastar. 1997 jylǵy ıAdrolyq zalal úshin azamattyq jaýapkershilik týraly Vena konventsııasy Qazaqstan Respýblıkasynyń 2011 jylǵy 10 aqpandaǵy Zańymen ratıfıkatsııalandy. Vena konventsııasynyń basty ıdeıasy – ıadrolyq oqys oqıǵa (apat) týyndaǵan jaǵdaıda, qondyrǵy operatory keltirilgen zalaldy óteýge mindetti. Bul rette, operatordyń ıadrolyq zalaldy óteý somasynyń eń tómengi mólsherin memleket aıqyndaıdy», - dep toqtaldy QR Energetıka mınıstri Nurlan Noǵaev.

Onyń sózine qaraǵanda, búgingi tańda Qazaqstanda zańnamalyq deńgeıde 1997 jylǵy Vena konventsııasynyń erejelerin qoldaný sharttary reglamenttelmegen. Atap aıtqanda, memleket operatordyń jaýapkershiliginiń shekterin aıqyndamaǵan jáne qarjylyq qamtamasyz etý men saqtandyrý máselelerin rettemegen.

«Qazaqstan Respýblıkasynyń qoldanystaǵy zańnamasy erekshe ıadrolyq táýekelder úshin jetkiliksiz jáne olarǵa beıimdelmegen, ıadrolyq avarııa saldarynan shyǵyndardy óteý tetigi joq jalpy azamattyq-quqyqtyq jaýaptylyqqa negizdelgen. Zań jobasynyń basty maqsaty – ishki zańnamany Vena konventsııasyna sáıkestendirý boıynsha Qazaqstannyń halyqaralyq mindettemelerin iske asyrý, ıadrolyq tehnologııalarǵa qol jetkizý arqyly atom salasyn damytýǵa járdemdesý, ıadrolyq zalal keltirgeni úshin ıadrolyq qondyrǵy operatorynyń jaýaptylyq shegin belgileý jáne qarjylyq qamtamasyz etý arqyly ıadrolyq zalal nátıjesinde zardap shekken adamdarǵa aqshalaı ótemaqynyń berilýin qamtamasyz etý», - dep túsindirdi mınıstr.

Bul úshin zań jobasynda ıadrolyq zalal keltirgeni úshin azamattyq-quqyqtyq jaýaptylyq jáne ıadrolyq qondyrǵy operatorynyń sondaı zalal úshin qarjylyq qamtamasyz etýdiń mindetti túrde bolýy engiziledi.

«Zań jobasy ıadrolyq qondyrǵylardyń radıatsııalyq qaýiptilik sanattaryna súıene otyryp, ıadrolyq zalal keltirgeni úshin ıadrolyq qondyrǵy operatorlarynyń saralanǵan jaýaptylyq shekterin paıdalanýdy kózdeıdi. ıAdrolyq qondyrǵynyń radıatsııalyq qaýiptilik sanattarynyń negizinde jaýaptylyqty belgileý nusqasy eń ońtaıly bolyp sanalady», - dedi Nurlan Noǵaev.