Mınıstr Atamqulov apattar kezinde belgi berý qurylǵysyn tekserdi
ASTANA. QazAqparat - QR Qorǵanys jáne aeroǵarysh ónerkásibi mınıstri Beıbit Atamqulov apatty jaǵdaılar kezinde shuǵyl shaqyrtý júıesin ázirleýshilermen kezdesti, dep habarlady «QazAqparat» HAA tilshisi.
Ǵarysh tehnıkasy jáne tehnologııa ınstıtýynyń mamandary mınıstrdi EVAK júıesiniń múmkindikterimen tanystyrdy.
«EVAK júıesi apat kezinde shuǵyl áreket etý qyzmet ókilderine 20 sekýndtyń ishinde habar bere alady. Bul qıyn jaǵdaıda qalǵan adamdarǵa kómek kórsetýde, ásirese jedel medıtsınalyq kómek qajet bolǵan kezde erekshe mańyzdy. Oqıǵa kezinde berilgen habar derekterdi óńdeý ortalyǵyna túsedi. Ol apat oryn alǵan jerdiń baǵytyn avtomatty túrde anyqtap, qandaı kóliktiń jol oqıǵasyna tap bolǵandyǵyn bilýge múmkindik beredi», - dedi ǵaryshtyq aqparattyq tehnologııalar zerthanasynyń meńgerýshisi Denıs Eremın.
Habar ortalyqtan EVAK júıesiniń operatoryna túsedi. Ol naqty ýaqyt rejıminde habar bergen tarappen birden baılanysqa túsip, ol jerge jedel járdem sııaqty ózge de qyzmet túrleriniń qajet nemese qajet emestigin jáne bolǵan oqıǵadan qansha adam zardap shekkendigin aınyqtaı alady. Budan ári habar tótenshe jaǵdaılar qyzmetine jiberiledi.
Júıeniń taǵy bir artyqshylyǵy - onyń Keden odaǵyna qatysýshy elderdiń osyndaı júıelerimen ıntegratsııalaný múmkindigi. Budan buryn habarlanǵandaı, EVAK júıesin engizý máselelerine qazaqstandyq kásipkerler qyzyǵýshylyq tanytty. Olar «Atameken» UKP-men birge Ulttyq ǵarysh ortalyǵyna bardy. Qorǵanys jáne aeroǵaryshtyq ónerkásip mınıstri Atamqulovqa «Elektrondy bilezik» retinde belgili baqylaýǵa alynǵan tulǵalardyń elektrondyq monıtorıngi júıesi kórsetildi.
