Mınıstr Astanadaǵy náresteniń ólimin baqylaýǵa alady
«Biz atalǵan oqıǵany baqylaýǵa alamyz. Búginde ondaı jaǵdaılarǵa baılanysty naqty quqyqtyq tetikter bar. Aldymen arnaıy saraptama ótkizý kerek. Odan keıin ishki ister mınıstrligi tergeý amaldaryn júrgizedi. Sonyń negizinde sottyń sheshimi shyǵarylady», - dedi Birtanov.
Onyń aıtýynsha, aǵymdaǵy jyldyń birinshi toqsanynda elimizde nárestelerdiń ólimi 8,6 protsentti qurady. Ótken jyly atalǵan kórsetkish 10,3 protsent bolǵan.
Aıta keteıik, baspasóz máslıhaty barysynda jýrnalıst Ásel Mámbeldınova 28 sáýir kúni Astanadaǵy 3 perzenthanada bala óliminiń bolǵanyn jetkizdi. «26 sáýirde keshkisin anasy tolǵaqpen sol perzenthanaǵa túsken. Biraq ózdigimen bosana almady. Sol kezde balanyń júrek qaǵysy álsiregen. Dárigerler sony bile tura, bárin tańerteńge deıin qaldyrǵan. Ertesinde aıaq astynan ishin jaryp, balany alyp shyqqan. Alaıda onyń ókpesine sý ketip qalǵan. Bir kúnnen keıin bala qaıtys boldy. Salmaǵy 4 keli, sap-saý bala edi. Endi ata-analar dárigerlerdi kinálap otyr. Sebebi keshkisin birden kesar tiligi jasalǵanda ondaı jaǵdaı bolmaıtyn edi», - deıdi jýrnalıst.