Mınıstr «Arselor Mıttal Temirtaý» týraly: Eshkimnen eshteńe tartyp almaımyz

Ónerkásip jáne qurylys mınıstri Qanat Sharlapaev Úkimet otyrysynan keıin ótken baspasóz máslıhatynda «Arselor Mıttal Temirtaýdyń» ornyna ınvestor tartý protsesi zań júzinde qalaı iske asatynyn túsindirdi, dep habarlaıdy QazAqparat. 

«Qazaqstan halyqaralyq ınvestorlardyń quqyqtaryn qurmetteıdi jáne eshkimnen eshteńeni tartyp almaıdy. Bul rette ónerkásiptik qaýipsizdik jáne qyzmetkerlerdiń qaýipsizdigin qamtamasyz etý talaby bar ekenin eske salamyz. Qazaqstanda jumys isteıtin ınvestorlarǵa osy qaǵıdatty ustaný qajet. Qazaqstanda eshkim sheteldik ınvestordyń menshigin tartyp ala almaıdy. Biz ınvestorlardan memleket talaptaryn saqtaýdy talap etemiz. Biraq eshqandaı tárkileý týraly másele joq», - dedi mınıstr.

Sondaı-aq, ol sheteldik ınvestordyń ornyna basqa ınvestor kelýi úshin aldyńǵysy naqty sheshim qabyldaýy kerek ekenin aıtady.

«Sheteldik ınvestor Qazaqstan naryǵynan ketemiz dep sheshim qabyldasa, ózge ınvestormen nemese memleketpen satyp alý-satý shartyn jasaıdy. Al «tartyp alý» týraly áńgime Qazaqstanda bolmaıdy dep úmittenem. Bul ınvestıtsııalyq klımatqa aýyr soqqy bolar edi. Aktsıonerler aýysatyn bolsa, ol Azamattyq kodeks aıasynda júredi. Bireýden tartyp alý týraly áńgimeni qoıý kerek shyǵar. Sharttyq, quqyqtyq qatynastar bar. Sheteldik ınvestorlarmen sonyń aıasynda jumys isteımiz», - dedi mınıstr.

Esimjan Naqtybaı