Mınıstr Aral teńiziniń mańyna sekseýil otyrǵyzý jumysyna túsinik berdi
ASTANA. KAZINFORM — Ekologııa jáne tabıǵı resýrstar mınıstri Erlan Nysanbaev Aral teńiziniń qurǵaǵan túbine sekseýil otyrǵyzý jumystaryna túsinik berdi.
- Qabyldanǵan sharalarǵa qaramastan, Qazaqstannyń úlesine Aral teńiziniń qurǵaǵan túbiniń 2,8 mln gektary tıesili. Aral teńiziniń ekologııalyq apatynyń keri áserin azaıtýdyń eń qolaıly joly – qurǵaǵan túbine orman ósirý, sol arqyly borpyldaq tuzdyń betin bekitip, qumnyń jyljýyna tosqaýyl qoıylady. El táýelsizdiginiń basynan 2020 jylǵa deıin Aral teńiziniń qurǵaǵan túbinde 195 myń gektar aýmaqta ósimdik otyrǵyzý jumystary júrgizildi. Tabıǵı jolmen ósken aǵashtardy qosqanda, jalpy orman alqaby 337 myń gektardy qurady. 2021 jyldan bastap Memleket basshysynyń tapsyrmasy boıynsha 1,1 mln gektar alqapqa sekseýil egý jumystaryn bastadyq, - dedi E. Nysanbaev ornyqty damýy salasyndaǵy mindetterdiń iske asyrylýyn monıtorıngileý jónindegi Parlamenttik komıssııanyń otyrysynda.
Onyń aıtýynsha, keıingi 4 jylda Araldyń qurǵaǵan túbinde, ıaǵnı 475 myń ga alqapta aǵash otyrǵý jumystary atqaryldy. Sonymen qatar 197 myń gektar aýmaqqa ormannyń tabıǵı ósýine yqpal jasaý jumystary atqaryldy. Osy oraıda jalpy 672 myń ga alqap qamtyldy.
Aral teńiziniń qurǵaǵan alqabyn sapaly kóshettermen qamtamasyz etý úshin Dúnıejúzilik bank jobasy aıasynda byltyr Qazaly qalasynda jylyna 3 mln sekseýil kóshetin ósiretin 33 gektar aýmaqta orman tálimbaǵy paıdalanýǵa berildi.
Budan buryn habarlanǵandaı, Senat tóraǵasy ekojúıeni damytýdaǵy problemany atady.
Eske salsaq, 2024 jyldyń qazanynan osy jyldyń qańtaryna deıin Soltústik Aral teńizine 1 mıllıard tekshe metr sý jiberildi.