Mınıstr Almatydaǵy dáriger ólimine qatysty: Medıtsına qyzmetkerin qorǵaıtyn zań jobasy ázirlendi
Bul týraly Ajar Ǵınııat óziniń Facebook-tegi paraqshasynda jazdy.
«Qazaqstannyń medıtsına jurtshylyǵy Almaty qalasyndaǵy gastroenterologııa ınstıtýtynda kóp jyldar boıy qyzmet atqarǵan belgili gastroenterolog - dáriger ıÝrıı Shýmkovtyń óltirilgeni týraly habardy estip qatty alańdaýda.
Jeke óz atymnan jáne densaýlyq saqtaý mınıstrligi ujymynyń atynan qaıǵyly qazaǵa ushyraǵan dárigerdiń týystary men jaqyndaryna qaıǵyryp kóńil aıtamyn. Bul oqıǵa respýblıkanyń densaýlyq saqtaý salasy úshin jantúrshigerlik asa aýyr qaıǵy bolyp otyr, beıbit ýaqytta dárigerlerge jaýyzdyq tanytqan, óz is-áreketterine jaýap bermeıtin adamnyń qolynan qaza tapty.
Otandyq medıtsına gastroenterologııanyń damýyna zor úles qosqan, júzdegen patsıentti joǵary medıtsınalyq biliminiń arqasynda emdep, ómirin saqtap qalǵan asa bilikti mamanynan aıyryldy. Úsh bala jetim qalǵan, al qart ata-anasy ulynan aıyrylǵan qaza tapqan dárigerdiń otbasy úshin qaıǵyly oqıǵanyń asa aýyr ekenin sózben jetkizý múmkin emes», – dep jazdy mınıstr.
Ajar Ǵınııat atalǵan is boıynsha tergeý amaldarynyń jan-jaqty ótip, qaıǵyly oqıǵaǵa kinálilerdi zańnyń barlyq qatań talaby boıynsha jazalaıdy degen senim bildirdi.
«Árbir osyndaı ıntsıdent búginde zańnamalyq tetikterdiń kómegimen medıtsına qyzmetkerleriniń quqyqtaryn senimdi qorǵaýdy qalyptastyrý, óz ómiri men densaýlyǵy úshin qoryqpaı qaýipsiz eńbek etýine kepildik beretin quqyqtyq normalardy qabyldaý qanshalyqty mańyzdy ekenin kórsetedi. Densaýlyq saqtaý mınıstrligi medıtsına qyzmetkerleriniń quqyqtaryn qorǵaý týraly zań jobasyn ázirledi. Jaqyn arada ol parlamenttiń qaraýyna engiziletin bolady», – dep jazdy ol.
Eske salaıyq, 4 sáýir kúni Almatyda dáriger emdelýshi patsıentiniń qolynan qaza tapty. Oǵan bireý ań aýlaıtyn myltyqtan oq atqan .
Aıta keteıik, asa aýyr qylmys qalanyń Bostandyq aýdanynda bolǵan.
Bul qylmys birden ashyldy. Kúdikti qalada engizilgen arnaıy jospar barysynda Almaty qalasy Alataý aýdany aýmaǵynda ustaldy.