Mınıstr álem chempıondary Aısara Kerimbekova men Bolat Jumadilovtiń jaǵdaıyna qatysty túsinik berdi

ASTANA. KAZINFORM — Týrızm jáne sport mınıstri Erbol Myrzabosynov mansabyn aıaqtaǵan jáne zeınetker sportshylardy qoldaýǵa qatysty túsinik berdi. 

Eske sala ketsek, buǵan deıin birqatar BAQ pen áleýmettik jelilerde sambo men dzıýdodan Qazaqstan atyn álemge tanytqan Aısara Kerimbekova búginde Almatyda aýla sypyryp kún kórip júrgeni týraly aqparat shyqty.

Odan bólek, 1996 jyly Atlanta Olımpıadasynda jáne 2000 jyly Sıdneı Olımpıadasynda bokstan kúmis júldeger atanǵan, sondaı-aq 1999 jylǵy bokstan álem chempıony Bolat Jumadilovtiń qazirgi múshkil jaǵdaıy týraly vıdeo tarady.

Jurtshylyq elimizdiń namysyn qorǵap, kók týdy kótergen ardager sportshylardyń jeke jaǵdaıyna alańdatýshylyq tanytyp, qoldaý bildirip jatyr. Osy oraıda jaǵdaıdy mınıstrden surap kórgen edik.

— Aısara anamyz boıynsha birneshe jınalys ótkizdim. Bizde 180 federatsııa bar, olardyń KPI aıasynda zeınetker sportshylar, jattyqtyrýshylardy jan-jaqty qadaǵalap, osyndaı jaıt qaıtalanbaýy úshin jumys istelip jatyr. Osy jumyspen aınalysý úshin zeınetkerler odaǵyn qurdyq. Búginde demeýshilerden qarajat alyp, qoldan kelgenshe ár óńir bolyp, federatsııa bolyp kómek kórsetemiz. Búginde Aısara áje jumysqa ornalastyryldy, basqa da materıaldyq jaǵdaıyn jasap jatyrmyz. Bolat aǵamyz boıynsha kezinde jumys usynsa da, jattyǵý protsesin júrgizdi, odan bólek, qazir jumysqa ornalastyrylyp jatyr jáne federatsııa tarapynan materıaldyq kómek kórsetildi, — dep jaýap berdi Erbol Myrzabosynov Parlamenttiń birlesken otyrysynan keıin.

Sondaı-aq mınıstr memleket tarapynan sportshynyń bala kezinen bastap, joǵary jetistigine deıin qoldaý kórsetiletinin eske saldy.

— Olımpıada jeńimpazy bolsa, olardyń ómir boıy alatyn jalaqysy bar. Odan bólek, álem, Azııa chempıonattarynda top jarǵanda ár sportshyǵa ústemeaqy tólenedi. Bıyl 10-ǵa jýyq Olımpıada, álem chempıony, elimizdiń namysyn kótergen sportshylar óńirlerdegi basqarma, federatsııa basshylyǵyna taǵaıyndalyp jatyr. Onyń ishinde Ermahan Ybyraıym, Baqtııar Artaev, Aqjúrek Tańatarov, Islam Baıramýkov, Serik Sápıev bar, — dep tolyqtyrdy vedomstvo basshysy.