Mınıstr Aqtoty Raıymqulova qandaı sport túrlerimen aınalysatynyn aıtty

NUR-SULTAN. QazAqparat – Elimizdiń Mádenıet jáne sport mınıstri Aqtoty Raıymqulova óziniń súıikti sport túrin atady, dep habarlaıdy QazAqparat tilshisi.

«Memleket basshysy Qasym-Jomart Toqaev ər Joldaýynda barlyq jastaǵy el azamattary arasynda buqaralyq sportty damytýdyń mańyzdylyǵyna erekshe den qoıyp keledi. Jekeleı alsaq, elimizde shańǵy sport túri jaqsy damyp keledi. Qazirgi tańda elimizde shańǵy sportymen 60 myńnan astam adam shuǵyldanady. Óńirlerde shańǵy bıatlon trassalary salynýda. Sonyń dáleli, elimizde qysqy sport túrlerin damytý jáne nasıhattaý maqsatynda Aqmola oblysynyń Şýchınsk qalasynda respýblıkalyq shańǵy bazasy ashyldy. Ol shańǵy-bıatlon trassasynyń zamanaýı bazasy, onda shańǵy tramplınderiniń kesheni, sport zaly, basseın, medıtsınalyq qyzmet kórsetý korpýsy bar. Odan bólek, jýyrda Aqtóbe qalasynd shańǵy bıatlon trassasy paıdalanýǵa berildi», - dedi A. Raıymqulova elordada ótip jatqan shańǵy festıvaliniń ashylý saltanatynda.

Sondaı-aq, mınıstr bıyl ótetin sporttyq is-sharalardyń deni Táýelsizdiktiń 30 jyldyǵynyń qurmetine arnalatynyn tilge tıek etti.

«Jyl sanap sportqa qumar jandardyń artyp kele jatqany qýantady. Bizde mınıstrlik tarapynan buqaranyń sportpen aınalysýyna jaǵdaı jasaıtyn bolamyz. Óz basyma kelsem, meniń súıikti sportym ol júzý, al qysqy sport túrinen árıne shańǵy tebý. Shańǵy tebýmen oqýshy kúnimnen aınalysyp kelemin. Osy oraıda búgingi shańǵy festıvaline qatysqaly turmyn», - deıdi ol.

Aıta ketsek, búgin elordada áýesqoı sportshylar arasynda shańǵy festıvali ótip jatyr.