Mınıstr Aqtóbedegi avtobýs órti týraly: Tergeý áli aıaqtalǵan joq
ASTANA. QazAqparat - QR Іshki ister mınıstri Qalmuxanbet Qasymov Aqtóbe oblysyndaǵy avtobýstyń órtenýine qatysty qylmystyq istiń tergelýi jaıynda aıtyp berdi, dep habarlaıdy QazAqparat tilshisi.
«Tergeý áli aıaqtalǵan joq. Úsh adam qamaýǵa alyndy. Ol jerde áli biraz nárseni dáleldeý kerek. Avtobýstyń ıesinen jaýap alynýy tıis. Qazir ol shetelde júr. Suraqtar kóp. Atalǵan qylmystyq is sottyń sheshimi shyqqanda aıaqtalady», - dedi Q.Qasymov jýrnalısterge bergen suxbatynda.
Aıta keteıik, aǵymdaǵy jyly qańtar aıynda Samara-Shymkent tasjolynda avtobýs órtenip, 52 adam qaza boldy. Barlyǵy - Ózbekstan azamattary. Atalǵan oqıǵa kezinde 5 adam aman qaldy. Olar avtobýstan shyǵyp úlgergen. Ekeýi - Ózbekstan azamaty, úsheýi - Qazaqstan azamaty. QR Іshki ister mınıstrligi avtobýs órtiniń negizgi sebebin jarııalaǵan bolatyn.
