Mınıstr AQSh-qa tikeleı áýe reısteri qashan ashylatynyn aıtty
ASTANA. QazAqparat - Bıyl Qazaqstan men AQSh arasynda úkimetaralyq kelisim rásimdeledi. Sonyń negizinde tikeleı Nıý-Iork qalasyna ushýǵa múmkindik bar, dep xabarlaıdy QazAqparat tilshisi.
QR Indýstrııa jáne ınfraqurylymdyq damý mınıstri Roman Sklıardyń aıtýynsha, Memleket basshysynyń tapsyrmasyn iske asyrý aıasynda bıyl «Eır Astana» áýe kompanııasymen birlese otyryp, Tokıo, Nıý-Iork, Shanhaı jáne álemniń basqa da iri qalalaryna áýe qatynasyn ashý josparlanyp otyr.
«Bıyl biz AQSh-qa ushý úshin akkredıtteý rásimderin bastaımyz. Mınıstrlik Qazaqstan men AQSh arasyndaǵy áýe qatynasy týraly úkimetaralyq kelisim jobasyn daıarlady, oǵan bıyl naýryz aıynda qol qoıý josparlanyp otyr», - dedi R.Sklıar Úkimettiń búgingi otyrysynda.
Onyń sózine qaraǵanda, azamattyq avıatsııa salasynda jolaýshy tasymaldaý kórsetkishteri ósip keledi. Máselen, ótken jyly Qazaqstan arqyly ushqan tranzıttik jolaýshylar sany 900 myń adamǵa jetti. Bul 2017 jylmen salystyrǵanda 45 protsentke artyq. Ol kezde 620 myń adam bolǵan.
«2020 jyly tranzıttik jolaýshylardyń sany 1,6 mıllıon adamǵa jetedi dep otyrmyz. Bıyl birinshi jartyjyldyqta Memleket basshysynyń tapsyrmasy boıynsha bıýdjeti tómen tuńǵysh ulttyq «Fly Arystan» áýe kompanııasyn iske qosý josparlanǵan. Ol alǵashqy jyly 1 mıllıonǵa jýyq jolaýshyny «Eır Astana» áýe kompanııasymen salystyrǵanda eki ese tómen baǵamen tasymaldaıdy degen jospar bar», - dep atap kórsetti R.Sklıar.
