Mınıstr Ákimshilik quqyq buzýshylyq týraly kodekske engizilgen basty ózgeristi atady

ASTANA. KAZINFORM — Mádenıet jáne aqparat mınıstri Aıda Balaeva Ákimshilik quqyq buzýshylyq týraly kodekske qandaı mańyzdy ózgerister engizilgenin aıtyp berdi.

Onyń sózinshe, eń basty ózgeristerdiń biri — ákimshilik jaza retinde qoǵamdyq jumystardy engizý boldy.

— Memleket basshysy Ákimshilik quqyq buzýshylyqtar týraly kodekske mańyzdy túzetýlerge qol qoıdy. Onyń keıbiri eki aıdan keıin kúshine enedi. Eń basty ózgeristerdiń biri — ákimshilik jaza retinde qoǵamdyq jumystardy engizý. Sottyń sheshimimen jáne quqyq buzýshynyń kelisimimen taǵaıyndalatyn qoǵamdyq jumystar — ońaltý men áleýmettik jaýapkershilikti arttyrýdyń tıimdi quraly bolmaq. Ókinishke qaraı, qoǵamda aınalasyndaǵylarǵa qurmetsizdik tanytý jaǵdaılary jıi kezdesedi. Máselen, qoǵamdyq oryndarda túkirý, qoqysty orynsyz jerge tastaý, tártip erejelerin elemeý jáne taǵy basqalardy atap ótýge bolady, — dep jazdy mınıstr Facebook-tegi paraqshasynda.

Balaeva atap ótkendeı, ózge elderdiń tájirıbesinde qatań sharalar mundaı máselelerdi tıimdi sheshe alatynyn kórsetip otyr.

— Máselen, Sıngapýrda kóshede túkirý nemese qoqys tastaý sııaqty áreketter úshin aıyppul nemese túzetý jumystary qarastyrylǵan, bul qalany álemdegi eń taza ortalyqtardyń birine aınaldyrdy. Londonda da osyndaı áreketter úshin aıtarlyqtaı aıyppuldar qarastyrylǵan. Mundaı tásil qoǵamdyq oryndarda tártip saqtaýǵa keshendi baqylaý men jaýapkershiliktiń mańyzdylyǵyn kórsetedi. Azamattardyń mádenıeti — bizdiń halyqaralyq arenadaǵy bedelimiz ben ınvestıtsııa tartýdaǵy jáne týrızmdi damytýdaǵy mańyzdy faktor. Jańa túzetýlerdi tıimdi iske asyrý jaǵdaıdy ózgertýge jáne azamattardyń óz áreketteri úshin jaýapkershiligin arttyrýǵa kómektesedi. Áleýmettik jaýapkershilik pen azamattardyń belsendiligi arqyly ǵana biz ár adam ortaq ıgilikke úles qosýǵa daıyn bolatyn qoǵam qura alamyz, — dep túıindedi Mádenıet mınıstri.

Eske salsaq, keshe Ákimshilik quqyq buzýshylyq týraly kodekske ózgeris engizetin zań maquldandy.