Mınıstr AITV ınfektsııasyn juqtyrý kórsetkishi joǵary 7 óńirdi atady

ASTANA. QazAqparat – Qazaqstannyń 7 oblysynda adamnyń ımmýn tapshylyǵy vırýsyn (AITV) juqtyrý kórsetkishi ortasha deńgeıden joǵary. Úkimet otyrysynda baıandama jasaǵan Densaýlyq saqtaý mınıstri Ajar Ǵınııat osylaı málim etti, dep habarlaıdy QazAqparat tilshisi.

«Qazaqstanda AITV ınfektsııasy turaqty 0,3% satysynda saqtalýda jáne ol elimizdiń barlyq óńirlerinde tirkelgen. Aıta ketý kerek, álemdik ortasha kórsetkish – 0,7%. Máselen, 7 oblysta - Qaraǵandy, Pavlodar, Shyǵys Qazaqstan, Soltústik Qazaqstan, Qostanaı oblystary men Astana jáne Almaty qalalarda syrqattanýshylyq el boıynsha ortasha kórsetkishten joǵary.

Al, juqtyrylǵan ımmýn tapshylyǵy sındromynan bolatyn ólim-jitim 6 oblysta ortasha respýblıkalyq kórsetkishten joǵary. Ol oblystar –Qaraǵandy, Pavlodar, Qostanaı, Soltústik Qazaqstan, Shyǵys Qazaqstan oblystary jáne Almaty qalasy. Qaraǵandy oblysynda bul kórsetkish ortasha respýblıkalyq deńgeıden 4 ese artyq», - dedi Ajar Ǵınııat.

Mınıstr halyq arasynda osy ınfektsııanyń profılaktıkasy úshin úkimettik emes uıymdardyń áleýeti paıdalanylmaı otyrǵanyn aıtty. Ajar Ǵınııattyń pikirinshe, olar epıdemıologııalyq jaǵdaıdy turaqtandyrýda jáne aýrýdyń jańa jaǵdaılaryn anyqtaýda mańyzdy ról atqarady.

«Túrkistan, Atyraý, Qostanaı, Shyǵys Qazaqstan jáne Astana, Shymkent qalalaryndaǵy 7 úkimettik emes uıym ǵana memlekettik áleýmettik tapsyrys aldy. Al elde 44 úkimettik emes uıymdar bar. Qalǵan óńirlerde memlekettik áleýmettik tapsyrys sońǵy jyldary bólinbeıdi, bul eldiń epıdemıologııalyq jaǵdaıyna yqpalyn tıgizetini sózsiz», - dep másele kóterdi ol.

Mınıstr málimdegendeı, sońǵy 10 jyl ishinde Qazaqstanda adamnyń ımmýn tapshylyǵy vırýsynyń (AITV) ınfektsııasymen syrqattanýshylyq 2 esege artty.