Mınıstr Agroónerkásiptik keshendi damytý jónindegi ulttyq joba týraly aıtty

NUR-SULTAN. QazAqparat - Aýyl sharýashylyǵy mınıstri Saparhan Omarov Agroónerkásiptik keshendi damytý jónindegi ulttyq jobany ázirleýge qatysty túsinik berdi, dep habarlaıdy QazAqparat tilshisi.

«Kelesi «besjyldyqqa» arnalǵan jańa Agroónerkásiptik keshendi damytý jónindegi ulttyq jobany ázirleý maqsatynda Aýyl sharýashylyǵy mınıstrligi Jumys tobyn qurdy. Onyń quramyna qoǵamdyq salalyq qaýymdastyqtar men odaqtardyń basshylary, aýyl sharýashylyǵyn damytý salasyndaǵy halyqaralyq sarapshylar, «Atameken» ulttyq kásipkerler palatasynyń ókilderi, sondaı-aq bıznes pen agrarlyq ǵylym ókilderi kirdi. Jumys tobynyń maqsaty – jańa Agroónerkásiptik keshendi damytýdyń memlekettik baǵdarlamasy tujyrymdamasyn daıyndaý. Naq osy tujyrymdama baǵdarlamalyq qujattyń negizin quraıdy», - dedi mınıstr Úkimet otyrysynda.

Onda mynadaı mindetter qamtylady:

Іshki naryqty áleýmettik mańyzy bar azyq-túlik taýarlarymen molyqtyrý; aýyl halqynyń tabysyn ósirý; eńbek ónimdiligin 2,5 esege arttyrý; agroónerkásiptik keshen ónimderiniń eksportyn 2 esege ulǵaıtý.

Mınıstrdiń aıtýynsha, qarjynyń, jer resýrstarynyń qoljetimdiligin arttyrý, agrarlyq ǵylymdy damytý, salany tsıfrlandyrý, veterınarııalyq jáne fıtosanıtarııalyq qaýipsizdik máseleleri, sondaı-aq shıkizattyń ǵana emes, sonymen qatar onyń óńdelgen ónimderiniń de eksporttyq áleýetin damytý máseleleri pysyqtalatyn bolady.