Mınıstr agrarshylardy aýyl turǵyndaryn jyl boıy jumyspen qamtýǵa shaqyrdy
ASTANA. KAZINFORM — Aýyl sharýashylyǵy mınıstri Aıdarbek Saparov sala kásipkerlerin óndiristik kórsetkishtermen ǵana shektelmeı, aýyldyq aýmaqtardy damytýǵa belsendi ınvestıtsııa salýǵa, turaqty jumys oryndaryn qurýǵa jáne zamanaýı áleýmettik ınfraqurylym qalyptastyrýǵa shaqyrdy.
Bul týraly mınıstr Qaraǵandy oblysyna jumys sapary barysynda óńirdiń agrarshylarymen kezdesýde jáne oblystaǵy ozyq sharýashylyqtardyń biri — «Shahterskoe» seriktestiginiń jumysymen tanysý kezinde aıtty.
Aıdarbek Saparov elimizde egin jınaý naýqany jalpy alǵanda jaqsy qarqynmen júrip jatqanyn atap ótti. Búginde dándi jáne dándi-burshaqty daqyldar 10 mln gektar alqaptan, ıaǵnı jalpy egis alqabynyń 63,9 paıyzynan jınaldy. 14 mln tonna astyq bastyryldy.
Egin jınaý qarqyny ótken jyldyń sáıkes kezeńimen salystyrǵanda joǵary. 2025 jyldyń osy kezeńinde 6,7 mln gektar alqap jınalyp, 9,5 mln tonna astyq bastyrylǵan bolatyn.
Qaraǵandy oblysynda dándi jáne dándi-burshaqty daqyldar 646 myń gektardan, ıaǵnı jalpy alqaptyń 71,4 paıyzynan jınaldy. Budan bólek, 197 myń tonna kartop pen 63 myń tonna kókónis jınaldy.
Kezdesýde talqylanǵan negizgi máselelerdiń biri — aýyl sharýashylyǵy taýaryn óndirýshiler úshin qarjylyq qoldaýdyń qoljetimdiligi boldy.
«Keń dala» baǵdarlamasy aıasynda kóktemgi egis jáne egin jınaý jumystaryn júrgizýge Qaraǵandy oblysyndaǵy 233 fermerge jalpy somasy 15,6 mlrd teńge kóleminde qarjylandyrý berildi. Bul qoldaý 182 myń gektardan astam egis alqabyn qamtydy.
Jeńildetilgen lızıng baǵdarlamasy boıynsha jalpy quny 18,2 mlrd teńge bolatyn 925 birlik aýyl sharýashylyǵy tehnıkasyn jetkizýge 866 shart jasaldy.
Soltústik Qazaqstan oblysynyń tájirıbesin taratý baǵdarlamasy aıasynda óńirge bólingen 7 mlrd teńge tolyq ıgerildi. Sýarmaly eginshilikti damytý jáne taýarlyq sút fermalaryn salý baǵyttary boıynsha tórt joba qarjylandyryldy.
Mınıstr agroónerkásiptik keshenniń qarqyndy damýy turaqty jumyspen qamtýdy qamtamasyz etýge, áleýmettik ınfraqurylymdy damytýǵa jáne aýyl turǵyndarynyń ómir súrý sapasyn arttyrýǵa yqpal etetinin atap ótti.
Osyǵan baılanysty ol kásipkerlerdi ózderi jumys isteıtin aýyldardyń ınfraqurylymyn damytýǵa belsendi ınvestıtsııa salýǵa jáne aýyl turǵyndary úshin qolaıly ómir súrý jaǵdaılaryn jasaýǵa shaqyrdy.
— Agrarshylar tek maýsymdyq jumysqa adam jaldamaı, aýyl turǵyndaryn jyl boıy turaqty jumyspen qamtýǵa umtylýy kerek. Adamnyń turaqty jumysy, laıyqty ómir súrý jaǵdaıy jáne týǵan aýylynda qajetti ınfraqurylymy bolǵan kezde onyń eńbekke de, jerge de kózqarasy múlde ózgeshe bolady. Bul týraly Memleket basshysy da birneshe ret aıtqan, — dedi Aıdarbek Saparov.
Mınıstr tıimdi sharýashylyq júrgizýdiń jáne bıznestiń áleýmettik jaýapkershiliginiń jarqyn úlgisi retinde jumys sapary barysynda barǵan «Shahterskoe» seriktestiginiń qyzmetin atap ótti.
Kásiporyn aýyl turǵyndaryn jumyspen qamtyp, aýyldyń áleýmettik-ekonomıkalyq damýyna eleýli úles qosyp otyr. Sharýashylyq kartop tuqymyn ósirý boıynsha elıtalyq tuqym sharýashylyǵy mártebesine ıe jáne dándi daqyldar tuqymynyń bastapqy tuqym óndirýshisi bolyp tabylady. Sonymen qatar sharýashylyq bazasynda etti baǵyttaǵy angýs tuqymdy iri qara mal ósiretin iri reprodýktor jumys isteıdi.
Mınıstr kartop qoımasynyń jumysymen, kartop jınaý barysymen, sondaı-aq eki iri ınvestıtsııalyq jobanyń júzege asyrylý barysymen tanysty. Atap aıtqanda, 1 792 gektar sýarmaly jerdi aýyl sharýashylyǵy aınalymyna engizý jáne qýaty 15 myń tonna bolatyn jańa kókónis qoımasyn salý jobalary júzege asyrylýda.
Kásiporyn óndiristi keńeıtýge ǵana emes, aýyldyń áleýmettik ınfraqurylymyn damytýǵa da ınvestıtsııa salyp otyr.
Mınıstrdiń pikirinshe, dál osyndaı tásil aýyldyq jerlerdegi bıznes úshin negizgi baǵdarǵa aınalýy tıis. ıAǵnı kásiporynnyń ekonomıkalyq tıimdiligi ózi jumys isteıtin aýmaqtyń damýyna degen jaýapkershilikpen qatar júrýi qajet.
«Shahterskoe» seriktestiginiń basshysy, «Eńbek eri» ataǵynyń ıegeri Georgıı Prokop memlekettik qoldaý qazirgi tańda aýyl sharýashylyǵy óndirisin damytý men onyń tıimdiligin arttyrýdyń mańyzdy faktory ekenin atap ótti.
— Búginde aýyl sharýashylyǵy taýaryn óndirýshilerdi qoldaýǵa baǵyttalǵan tutas quraldar kesheni ázirlendi. Investıtsııalyq sýbsıdııalar men jeńildetilgen nesıelendirýdiń arqasynda biz tehnıkany jańartyp, sýarmaly eginshilikti damytyp, zamanaýı saqtaý nysandaryn salyp, óndiris qýatyn kezeń-kezeńimen arttyra alamyz, — dedi Georgıı Prokop.
2025 jyly «Shahterskoe» seriktestiginiń negizgi kapıtalyna salǵan ınvestıtsııa kólemi 5 mlrd teńgeden asty.
Aıdarbek Saparov eldiń azyq-túlik qaýipsizdigin nyǵaıtý úshin sýarmaly alqaptardyń kólemin ulǵaıtý jáne aýyl sharýashylyǵy ónimderin saqtaýdyń zamanaýı nysandaryn qurý strategııalyq mańyzǵa ıe ekenin atap ótti.
Óńirdiń aýyl sharýashylyǵy taýaryn óndirýshileri mınıstrge memlekettik qoldaý men qarjylandyrý, óndiristi damytý, ınvestıtsııalyq jobalardy iske asyrý jáne agroónerkásiptik keshendi odan ári damytý máseleleri boıynsha ózderin tolǵandyrǵan suraqtaryn qoıyp, tuşymdy jaýap aldy.
Buǵan deıin Qazaqstanda aýyl sharýashylyǵy tehnıkasyn jańartýǵa 350 mlrd teńge bólingenin jazǵanbyz.
