Mınıstr Abaev Serikjan Biláshtiń ustalýyna qatysty pikir bildirdi
ASTANA. QazAqparat - Aqparat jáne qoǵamdyq damý mınıstri Dáýren Abaev ulttyq alaýyzdyqty qozdyrý kúdigimen ustalǵan Serikjan Biláshtiń isine qatysty pikir bildirdi, dep habarlaıdy QazAqparat tilshisi.
«Eń aldymen, sheteldegi qazaqtardyń múddesin qorǵaý - geosaıası oıynda basqa eldiń oıynshyǵyna aınalyp ketpeýi kerektigin aıtqym keledi. Dál osy taqyrypqa kelgende keıbir BAQ pen quqyq qorǵaý uıymdardyń belsendiligi arta túsýi ábden múmkin. Ustaý jaǵdaıyna keler bolsaq, tergeýdiń sońyn kútýimiz kerek. Qasaqana ulttyq alaýyzdyqty qozdyrý - óte salmaqty aıyptaý. Kez kelgen etnosqa qatysty jıhadqa shaqyrý - oıynshyq emes. Osyndaı úndeýdiń keselinen myńdaǵan qarapaıym azamattar zardap shegip jatady. Qazaq «on páleniń toǵyzy tilden» deıdi. Jalpy, tergeý bárin anyqtap, jýyq arada bolǵan oqıǵanyń mán-jaıy aıtylaryna senimdimin», - dedi Dáýren Abaev «Habar» arnasyndaǵy «Ashyq dıalog» baǵdarlamasynda.
Eske sala ketsek, Astana qalasynyń Polıtsııa departamenti 2019 jylǵy 10 naýryzda ulttyq alaýyzdyqty qozdyrý kúdigimen Qazaqstan Respýblıkasynyń azamaty Serikjan Biláshti ustaǵan bolatyn. Buǵan negiz bolǵan Serikjan Biláshtiń 2019 jyldyń 8 aqpanynda Almaty qalasynda eske alý is-sharasy kezinde ashyq túrde aıtylǵan etnıkalyq qytaılyqtarǵa qarsy «jıhadqa» shaqyrýy. Bul fakt boıynsha Astana qalasynyń Polıtsııa departamentimen 2019 jylǵy 21 qańtarda jergilikti turǵynnyń aryzy boıynsha Qazaqstan Respýblıkasy Qylmystyq kodeksiniń 174-babanyń 2-bóligi boıynsha sotqa deıingi tergeý óndirisi bastalǵan edi.
