Mınıstr A. Muhamedıuly Golovkındi jeńisimen quttyqtady
ASTANA. QazAqparat - Qazaqstan Respýblıkasy Mádenıet jáne sport mınıstri Arystanbek Muhamedıuly jerlesimiz Gennadıı Golovkındi búgin AQSh-ta ótken kezdesýde Domınık Ýeıdti aıqyn basymdylyqpen ádemi jeńgeni úshin alǵashqylardyń biri bolyp quttyqtady.
«Sizdi kezekti tamasha 35-i jeńisińizben quttyqtaýǵa ruqsat etińiz. Siz bizdiń elimizdiń maqtanyshysyz. «GGG» qazirgi tańda Qazaqstannyń ulttyq brendine aınalyp, patrıotızmniń, Otanǵa degen mahabbat pen súıispenshiliktiń jarqyn úlgisi bolyp otyr. Qazaqstanda Sizge uqsaǵysy keletin boksshylardyń jańa legi jetilip kele jatyr. Sizdiń tamasha jeńisterińizdi bizdiń elimizde ǵana emes, shet memleketterde de maqtanysh tutady. Bokstyń mıllıondaǵan jankúıerleri Sizdiń áserli jekpe-jekterińizdi taǵatsyzdana kútedi. Barsha qazaqstandyq sportshylar men jeke ózimniń atymnan Sizdi jeńisińizben taǵy bir márte quttyqtap, myqty densaýlyq, tabys jáne jańa jeńister tileımin», - delingen Mádenıet jáne sport mınıstriniń quttyqtaýynda.
Eske sala keteıik, jerlesimiz G.Golovkın (35-0, 32 KO) búgingi kúni álemdik boks serııalarynyń WBA, IBO, WBC (Interim) jáne IBF sekildi tórt belbeýiniń ıegeri.
Búgin sýperchempıon, jeńimpaz Gennadıı Golovkın Los-Andjelestegi «Forým» arenasynda buǵan deıin esh jeńilip kórmegen amerıkalyq Domınık Ýeıdti (18-0, 12 KO) ekinshi raýndta nokaýtqa jiberip, kezekti jeńisine qol jetkizdi.
