Mınıstr: 4-kýrs stýdentteri mindetti túrde dıplom qorǵaıdy
NUR-SULTAN. QazAqparat – 1, 2, 3-kýrs stýdentteriniń sessııasyna qatysty ár JOO ózi sheshim qabyldaýy kerek. Bul týraly QR Bilim jáne ǵylym mınıstri Ashat Aımaǵambetov Instagram jelisindegi tikeleı efır barysynda aıtty, dep habarlaıdy QazAqparat tilshisi.
«JOO-ǵa túskisi keletin túlektiń bári UBT tapsyrýy kerek. Úsh jyl buryn attestat alý úshin jáne JOO-ǵa túsý úshin UBT tapsyrǵan. Al qazir UBT tek JOO-ǵa túsý úshin tapsyrylady. Keıbir mamandyqqa túsý úshin UBT-dan bólek shyǵarmashylyq emtıhan tapsyrý kerek bolady. Buǵan qatysty kóp másele bolmaıdy, JOO-nyń bárine eskertildi», - deıdi Bilim jáne ǵylym mınıstri Ashat Aımaǵambetov.
Ol ár JOO stýdentter sessııany qalaı tapsyratynyn ózi sheshetinin aıtty.
«Bilim jáne ǵylym mınıstrligi biz úshin sheshim qabyldaýy kerek dep oılaıtyndar bar. 1, 2, 3-kýrs stýdentteriniń sessııasyna qatysty ár JOO ózi sheshim qabyldaýy kerek. JOO-nyń biri sessııany jazda ótkizemiz dep sheshse, endi biri aǵymdaǵy baǵa qorytyndysy negizge alynady dep sheshti. Al 4-kýrs stýdentteri keshendi emtıhan tapsyryp, dıplomdaryn mindetti túrde qorǵaıdy», - deıdi ol.
Sondaı-aq, mınıstr qashyqtyqtan oqý júıesine kóshýimiz bilim grantynyń kóbeıýine áser etpeıtinin jetkizdi
«Qashyqtyqtan oqý júıesine kóshýimiz bilim grantynyń kóbeıýine áser etpeıdi. Kolledjderde bilim grantyn kóbeıtý týraly josparymyz bar, sebebi jyl saıyn arnaıy bilim berý salasyn kóbirek qamtımyz», - deıdi Bilim jáne ǵylym mınıstri Ashat Aımaǵambetov.
